Nga Blendi Gashi
‘Miku i mirë shihet në kohë të vështira”. Kjo është një fjalë e urtë popullore që mund t’i kushtohet 15 shteteve që njohën pavarësinë e Kosovës më 17 shkurt 2008, por që nuk mbështetën anëtarësimin e vendit tonë në UNESCO.
Vota e tyre pro do të thoshte automatikisht pranim i Kosovës në këtë organizatë për Edukim, Shkencë dhe Kulturës. Por, vendosën për arsye të tyre, disa të abstenojnë, të tjera të votojnë kundër, dhe kishte të tilla që fare nuk morën pjesë në sallë.
Shtrohet pyetja se çka i shtyu këto 15 shtete njohëse, të mos votojnë për Kosovën në UNESCO?
Profesori i marrëdhënieve ndërkombëtare, Afrim Hoti, mosvotimin nga vendet që na kanë njohur e sheh si çështje të dështimit të diplomacisë bilaterale.
“Këto vende kanë njohur Kosovën, që nënkupton shenjë të parë të komunikimit pozitiv, por më pas, si duket raportet me këto vende janë lënë në harresë dhe si rrjedhojë kemi pasur ndryshim të kursit të tyre. Kjo është për keqardhje”, ka deklaruar Hoti.
Avokati Kujtim Kerveshi, ka qenë më konkret kur ka shtruar pyetjen retorike (pa përgjigje, ose me përgjigje të nënkuptuar), se vërtet çka i shtyu Japoninë e Poloninë që na njohën më 2008-ën që të mos votojnë për Kosovën në UNESCO.
“Debati ka filluar të devijojë: çështja është se na duheshin 3 vota më shumë, atëherë pse nuk pyesni çka e shtyri Japoninë dhe Poloninë të abstenojë, shtete këto që kanë njohur pavarësinë?!”, ka shkruar Kerveshi në Facebook.
Analisti politik, Blerim Burjani, e quan të pakuptimtë dhe të paarsyeshëm vendimin e marrë nga këto shtete, duke thënë se motivet ndoshta mund të jenë në ngjarjet e vitit 2004.
“Kosova ka investuar miliona për restaurimin dhe ndërtimin e objekteve religjioze, ose për ngjarjet e vizitave të pelegrinëve serbë. Me të vërtetë jam befasuar me qëndrimin e këtyre shteteve”, ka deklaruar Burjani për tesheshi.com.
15 shtetet njohëse të pavarësisë, por që s’na përkrahën për në UNESCO:
Kolumbia, Antigua dhe Barbuda, Burundi, Unioni i Komoreve, Egjipti, Japonia, Polonia, Guinea Bisau, Mauritania, Mikronezia, Peru, Koreja e Jugut, Sau Tome dhe Principe, Sëalizandi dhe Uganda.
/tesheshi.com/
