Kryeministri grek Aleksis Cipras sfidon kritikët e tij brenda partisë duke thirrur një “referendum” të anëtarësisë së Syriza-s për marrëveshjen e fundit të nënshkruar prej tij në Brukel me kreditorët ndërkombëtarë. Ai tha se Qeveria bëri një zgjedhje të vështirë për të mbrojur Greqinë nga falimentimi.
Në një fjalim përpara Komitetit Qendror të partisë prej 200 anëtarësh, ai propozoi një votim “po ose jo” për paketën e shpëtimit prej 86 miliardë eurosh që duhet të mbahet të dielën.
Stacionet e radios dhe televizionet në Greqi ndërprenë programet për të transmetuar live fjalimin e Cipras nga takimi partiak në një kinema në qendër të Athinës, shenjë kjo sesa i rëndësishëm shihet takimi për stabilitetin e vendit.
Cipras apeloi anëtarët e Komitetit të flasin hapur duke thënë: “Të gjithë ata që duan një qeveri apo kryeministër tjetër, duhet ta thonë. Ata që mendojnë se kjo është marrëveshja më e keqe duhet ta thonë”.
Që pas marrëveshjes së Brukselit, Cipras përballet me grupin e vijës së ashpër në Syriza. Fraksioni i njohur si Platforma e Majtë kundërshton reformat e kërkuara si detyrim për paketën e shpëtimit financiar. Kreu i këtij grupi, Panagiotis Lafazanis, një ish-komunist dhe ish-ministër i Energjisë, ka dalë hapur me argumentin se Greqia duhet ta kishte refuzuar ofertën e kreditorëve dhe të kthehej tek dhrahmia./tesheshi.com/
