Joe Biden i dha nderimin më të lartë ushtarak një ish-pilot helikopteri sulmues të Ushtrisë Amerikane, i cili shpëtoi katër ushtarë gjatë Luftës së Vietnamit, rreth 24 orë përpara se presidenti demokrat i SHBA-së të udhëtonte për në Hanoi.
Larry Taylor, 81 vjeç, u përball me zjarrin e armikut për të shpëtuar një grup ushtarësh të bllokuar pranë Saigonit – tani Ho Chi Minh City – nga forcat e Viet Kongut më 18 qershor 1968.
“Medalja e Nderit është njohja më e vjetër dhe më e lartë për trimërinë e kombit tonë.
Sot, ajo i shkon kapitenit Larry L. Taylor, një amerikan që bëri gjithçka në fuqinë e tij për t’iu përgjigjur thirrjes së detyrës, i cili rrezikoi jetën e tij për të shpëtuar jetën e të tjerëve në nevojë.
Ky është guxim, ky është vendi ynë në të mirën e tij,” tha Joe Biden gjatë një ceremonie në Shtëpinë e Bardhë, duke ia kaluar medaljen në qafë udhëheqësit të skuadriljes në pension.
Pas disa përpjekjeve të dështuara për të hapur një rrugë të sigurt për të shpëtuar katër ushtarët, Larry Taylor injoroi urdhrin e qartë që iu dha për t’u kthyer në bazën e tij.
Ai u ul nën zjarrin e armikut në mënyrë që ushtarët të hipnin në platformën e uljes dhe të mbaheshin pas raketave në gypin e avionit dyvendësh për t’i çuar në siguri.
Herozmi i tij të kujton të kujton rolet e Silvester Stalone-s në filmat mbi frontin e Vietnamit.
Joe Biden pritet të vizitojë Vietnamin të dielën për t’u takuar me Sekretarin e Përgjithshëm të Partisë Komuniste në pushtet, Nguyen Phu Trong dhe zyrtarë të tjerë, si pjesë e përpjekjes së administratës së tij për të frenuar ndikimin e Kinës në rajon.
Vizita synon gjithashtu të vazhdojë përpjekjet për të “tejkaluar trashëgiminë e dhimbshme që ndajmë” nga Lufta e Vietnamit, tha dje këshilltari presidencial i SHBA-së për sigurinë kombëtare, Jake Sullivan. /tesheshi.com/
