Dita nisi me lajmin që një sasi droge me vlerë 4 milion euro e destinuar për në Shqipëri, u kap në një port italian. Ajo ishte fshehur brenda një sasie ngarkese me pula të ardhura nga Brazili, që gjithashtu do ishte për tregun shqiptar.
Në këtë rast, shqetësues është dhe fakti se ne jemi të detyruar të importojmë pula nga larg – që mbi të gjitha na vijnë të përziera me drogë – ndërkohë që kjo shpezë është aq familjare tek ne dhe, me një popullsi goxha fshatare, fare mirë mund t’i kishim tonat për konsum.
Por para faktit se 4 milion euro drogë do të futeshin në Shqipëri, kjo puna e pulave të importuara nga Amerika Latine është një çikërimë.
Sepse, sasia që pritej përkthehet si një korruptim katastrofal i segmenteve të shtetit, sidomos policisë dhe doganave.
Ndaj, në raste ngjarjesh tilla, lajm nuk përbën sasia dhe vlera e saj, por ajo se sa forca janë angazhuar për ta pritur “mallin” dhe siguruar atë deri në destinacion. /tesheshi.com/
