Eurodeputeti kroat Davor Stier u zgjodh të hënën kryetar i delegacionit të Parlamentit Evropian për marrëdhëniet me Bosnje-Hercegovinën dhe Kosovën, transmeton agjencia Hina.
Në deklaratën e tij, Stier thekson se do t’i kushtojë vëmendje të veçantë perspektivës evropiane të këtyre dy vendeve dhe reformave që do të duhet të zbatohen në rrugën drejt Bashkimit Evropian.
Si kryesues i delegacionit të Parlamentit Evropian, Stier do të bashkëkryesojë dy komitete të përbashkëta parlamentare: Komitetin Parlamentar të Stabilizimit dhe Asocimit BE-BiH dhe Komitetin Parlamentar të Stabilizim-Asociimit BE-Kosovë.
Stabiliteti dhe siguria janë thelbësore
Ai bëri të ditur se synon të mbajë seancën e komisionit të përbashkët parlamentar që në muajin e ardhshëm.
Ai po ashtu ka bërë të ditur se si do të punojë për perspektivën evropiane të Kosovës.
“Paqja, siguria, dialogu dhe normalizimi i marrëdhënieve me Serbinë, mbrojtja e të drejtave të pakicave dhe të gjithë qytetarëve të Kosovës, si dhe zbatimi i rendit kushtetues në gjithë territorin e Republikës së Kosovës do të jenë çështje prioritare në punën e komisioni i përbashkët parlamentar”, tha Stier.
Ai shton se sfidat gjeopolitike me të cilat ballafaqohet BE-ja kërkojnë një angazhim më të fortë në Evropën Juglindore dhe se në këtë drejtim, stabiliteti dhe siguria në dhe Kosovë janë të një rëndësie vendimtare për të gjithë kontinentin.
Në krye të delegacionit të Parlamentit Evropian për marrëdhëniet me Malin e Zi, u zgjodh Thomas Waitz nga Austria, anëtar i grupit të Gjelbërve. Në krye të delegacionit për marrëdhëniet me Shqipërinë u zgjodh italiani Marco Tarquinio nga grupi i socialistëve dhe demokratëve.
Takimi i delegacioneve të Parlamentit Evropian për marrëdhëniet me Serbinë dhe Maqedoninë e Veriut do të mbahet më 3 tetor. /tesheshi.com/
