Një çift kinez, i cili nuk kishte mundësi t’ia lejonte vetes një shtëpi si duhet pas martesës, shkuan të banojnë në një shpellë në një mal afër Nanchong-ut. Tashmë janë bërë 54 vjet që çifti jeton aty.
Fillimisht, Liang Zifu dhe Li Suying e ndanin ambientin me tre familje të tjera, deri sa ato vendosën të shkojnë të banojnë në “shtëpi të vërteta”, e po kështu kanë bërë edhe katër fëmijët e çiftit.
Megjithatë, çifti i moshuar janë të kënaqur me kushtet e tyre të jetesës, aq sa kanë refuzuar çdo përpjekje për t’i bindur që të ndërronin banesë. Madje, edhe propozimin për t’u bërë dhuratë një shtëpi, menjëherë pasi historia e tyre u bë publike.
Në fakt, ky refuzim nuk duhet të na habisë shumë pasi të dy kanë kaluar gjithë jetën e tyre duke e shndërruar shpellën në një ambient të banueshëm.
Sot, ata kanë një dhomë ndenjeje, kuzhinë dhe një kopësht ku kultivojnë perimet, si dhe një stallë bagëtish.
Bashkëshortët nuk kanë pranuar që ta hedhin pas krahëve punën e tyre të një jete. Ata thonë se shpella është e freskët gjatë verës dhe më e ngrohtë se një shtëpi normale gjatë dimrit. /tesheshi.com/
