Nga Blendi Gashi
Presidenti Hashim Thaçi, kryeministri Ramush Haradinaj e kryeparlametnari Kadri Veseli, por pa zv.kryeministrin Fatmir Limaj, u mblodhën të dielën mbrëma me shumë anëtarë të tjerë të qeverisë në vilën private të zv.kryeministrit Behgjet Pacolli në Hajvali, në vendin ku edhe u nënshkrua muaj më parë marrëveshja për bashkëqeverisje mes palëve.
Ky takim ndodhi pa ndonjë paralajmërim, për çka mediat kosovare raportuan se krerët e shtetit janë mbledhur për të folur për temat e mëdha si Demarkacioni, Asociacioni, ushtria etj.
Por Avni Arifi, këshilltar i kryeministri Haradinaj, ka mohuar këtë gjë duke thënë se është vetëm një takim pa kravata dhe se nuk është diskutuar për Demarkacionin.
“Darkë informale pa protokoll, pa kravata që për herë të dytë e bëjnë. Këtë herë nikoqir ka qenë zv/kryeministri, Behgjet Pacolli. Është caktuar para disa ditëve dhe nuk besoj që temat që diskutohen aty janë me peshë për opinionin sepse është darkë informale”, ka thënë Arifi.
Dhe kjo deklaratë e Arifit është e kuptueshme pasi nga ai nuk pritet që të tregon se për çfarë me të vërtetë u mblodhën udhëheqësit.
A u festua lëshimi pe nga Ramushi?
Duke qenë se kjo darkë u shtrua një ditë para se Kryesia e Kuvendit të vendos për procedimin apo jo të marrëveshjes së Demarkacionit me Malin e Zi në një nga seancat e radhës, pashmangshëm shtrohet pyetja: a u festua lëshimi pe i Ramushit për Demarkacionin i cili është njeriu kryesor që kundërshtoi marrëveshjen e Thaçit?
Dhe nga foto shihet Thaçi i buzëqeshur por jo edhe Haradinaj, që thuajse tregon triumfin përfundimtar të presidentit ndaj kryeminsitrit.
Të buzëqeshur janë edhe kryeparlamentari Veseli dhe zv.kryeministrat Hoxhaj dhe Pacolli, ku vlen të përmendet se ky i fundit ka kërcënuar me dalje nga koalicioni nëse nuk gjendet një zgjidhje për Demarkacionin.
Megjithatë e hëna do jetë tregues se çfarë u zie në shtëpinë e Pacollit, kuptohet ç’vendime u morën pasi menyja e ushqimit sigurisht ka qenë e pasur, kjo nuk është një problem i madh për biznesmenin Pacolli.
Në mesin e shumë përfaqësuesve nga tri partitë e koalicionit qeverisës është vetëm një femër. Ministrja e Ambientit, Albena Reshitaj vërehet të jetë e vetme si femër në mesin e 21 burrave prezentë sa ishin sonte në këtë darkë.
Limaj s’shkoi në darkë, ja cila mund të jetë arsyeja…
Në mesin e krerëve të shtetit pjesëmarrës në takim nuk ishte zv.kryeministri Fatmir Limaj edhe pse sipas mediave ai ishte u ftuar në darkën e organizuar nga Pacolli.
Përveç Limajt, në këtë takim nuk ishin as dy ministrat nga radhët e NISMA-s Socialdemokrate, Shyqiri Bytyqi dhe Bajram Hasani. Megjithatë ata kishin një përqafues të tyre. Në këtë dark prezent ishte ministri i Punës dhe Mirëqenies, Skender Reçica.
Arsyeja pse Limaj nuk shkoi në këtë darkë nuk dihet, megjithatë nëse shikohet fotografia mësohet se fajtori kryesor është presidenti Thaçi, të cilin tani e ka “armikun” më të madh.
Limaj, sigurisht me mospjesëmarrjen në këtë takim nuk ka dashur të bëhet pjesë e çfarëdo marrëveshje ku në tavolinë është edhe Thaçi. Ditë më parë Limaj ka pranuar se ka vite që nuk flet me Thaçin.
Vlen të theksohet se në darkën e Pacollit ishin prezent 21 burra dhe veç një grua, pra ministrja e Mjedisit Albena Reshitaj.
Kujtojmë se sa i përket Demarkacionit, PDK si partia më e madhe në koalicion, ka thënë se do ta votojë marrëveshjen, përderisa NISMA po provon të gjejë një zgjidhje ku Limj së fundmi ka takuar ministrin e Jashtëm malazez, ndërsa LDK-ja ka thënë se do ta votojë, edhe pse për koalicionin aktual kanë paralajmëruar se nuk do ta lënë ta kalojë lehtë me miratimin e versionit të cilin e kanë kundërshtuar tash e 3 vjet.
Nga ana tjetër, Behgjet Pacolli nga AKR-ja ka kërcënuar se do ta braktisë koalicionin nëse nuk i gjendet zgjidhje demarkacionit. /tesheshi.com/
