Ardit Bido, një ish-gazetar e tashmë Drejtor i Arkivave, është ndër polemistët kryesorë me zëdhënësit e politikës greke në Shqipëri, ato që zakonisht ftohen në studio televizive për tema të nxehta si “Himara” apo “Beleri”.
Me status historian e studiuesi, me origjinë nga qyteti simbol i bashkëjetesës shqiptaro-minoritar kurrë me probleme, Delvina, ai vijon të jetë sikleti më i madh ndaj kundërshtarëve të tij kinse minoritarë nga Himara, ku veçon Marin Suli, një ndër emrat kryesorë të OMONIA-s, sekretar i saj, njëherësh një ndër ithtarët beleristë.
Por cila është arma me të cilën tentohet të goditet Bido prej tyre apo prej tij në debat? Posti i tij.
Së fundi, mes tyre qe ky debat:
Suli: Një nga zërat më seriozë në denoncimin e problemeve do jetë eurodeputeti i ri shqiptaro-grek, Fredi Beleri.
Bido: Është deputet grek. Nuk është shqiptar. Për ta saktësuar për publikun.
Suli: ….Është servili i Edi Ramës dhe nëpunësi i Ramës…
Pra, kur Suli s’ka argument, zhvendoset te pozicioni zyrtar i Bidos, pa asnjë lidhje me thelbin e debatit. Bido është drejtor institucioni, ndër ato institucioni larg politikës së ditës, pa pikëtakime, ndërkohë që dhe në qoftë servil i Ramës, gjë e cila nuk është vënë re ndonjëherë në ligjërimin e tij mediatik e publik, kjo nuk e kompromenton aspak lëndën e fortë me fakt e argument bashkë që ai sjell në debat me faktorin filogrek.
Kjo ngjan me abuzimin tjetër të beleristëve, në Shqipëri apo Greqi, të cilët e (keq)gjykojnë Ramën si mik të Erdoganit dhe lexojnë te kjo miqësi antigreqizimin e pretenduar të tij.
Është ky një tregues tipik i një mendësie ballkanike në nivelet më të rëndomta, mbajtur gjallë nga deliri i madhështisë dhe mania e persekutimit. /tesheshi.com/
