Victor Valdes, ish-portieri i Barcelonës, ka pranuar të flasë për të përditshmen spanjolle El Pais, duke rrëfyer aventurën e tij të hidhur tek Mançester Junajtedi, si dhe aventurën e re në kampionatin belg, tek Standardi i Liezhit, ku ka rigjetur gëzimin dhe lumturinë e munguar prej kohësh.
Megjithatë, nënshkrimi i një ish-kampioni bote me një skuadër të rangut të Standardit të Liezhit mund të duket i çuditshëm për shumëkënd, madje dhe për vetë bashkëlojtarët e tij në skuadër.
“Victor, çfarë bën një kampion bote këtu?”, është pyetja të cilën e ka dëgjuar shumë herë gardiani spanjoll me të zbarkuar në kampionatin belg.
Ndërkohë, Valdes është përgjigjur me maturi, duke treguar për El Pais se zgjodhi skuadrën belge pasi karriera e tij futbollistike rrezikonte të merrte fund.
“Dëgjoni kolegë. Verën e shkuar u riktheva në shtëpinë time dhe mendova se futbolli ka përfunduar për mua. Mirëpo, më pas vazhdova të besoja dhe erdha këtu, ngaqë kjo ishte mundësia e vetme e jetës time për t’iu rikthyer normalisht futbollit”, u pati thënë Valdes bashkëlojtarëve të tij.
Në artikullin e publikuar nga mediumi spanjoll, Valdes nuk e mban të fshehur gëzimin që ka rilindur sërish brenda fushës së blertë pasi ka duruar çdo torturë nga Louis van Gaal-i tek Mançester Junajtedi vetëm e vetëm për të përfunduar sërish me doreza në duar.
Valdes nuk harroi ta falenderojë edhe ish-skuadrën e tij, Barcelonën, me të cilën fitoi gjithçka që mund të fitohej në futboll, për mundësinë që i kishte dhënë për të luajtur për të. /tesheshi.com/
