Takimi i shtatë vendeve më të industrializuara në Ise-Shima të Japonisë do të ketë në qendër të vëmendjes ekonominë globale dhe sigurinë në nivel botëror.
Udhëheqësit e SHBA-së, Kanadasë, Britanisë, Italisë, Gjermanisë, Francës dhe Japonisë, së bashku me përfaqësuesit e BE-së, do të diskutojnë gjatë dy ditëve të takimit dhe për krizën e refugjatëve, për terrorizmin e për sigurinë detare.
Posaçërisht kriza e refugjatëve në Europë do të ketë një vend të posaçëm, ndërsa presidenti i Këshillit Europian, Donald Tusk, do të kërkojë angazhimin e shtatë vendeve për më shumë mbështetje në shkallë botërore për refugjatët.
Rritja globale mbetet një përparësi e G7-ës. Udhëheqësit pritet të japin një mesazh të fortë në mbështetje të tregtisë së lirë, si një mjet për nxitjen e punësimit dhe për standarde më të larta jetese.
Situata në Siri, në Ukrainë, Irak e Libi, do të jetë gjithashtu temë e bisedimeve.
Ky takim pason atë të 2015-ës në Gjermani. Tkurrja në G7 është nga viti 2014, që prej shkeljes së integritetit territorial të Ukrainës nga Federata Ruse.
Ndërkohë, në kuadër të qëndrimit në Japoni, presidenti amerikan, Barack Obama, do të vizitojë të premten Hiroshimën, vendin ku u hodh e para bombë atomike. Ai bëhet presidenti i parë amerikan në detyrë që e ndërmerr këtë akt. /tesheshi.com/
