Në episodin e 6-të të sezonit të 3-të, Kryeministri Edi Rama në podkastin FLASIM, “Celulari që bëhet kuletë” kishte të ftuar 3 ambasadorë nga bota e re, përfaqësues të një komuniteti që po zhvillohet dhe që i ofron shoqërisë rrugë krejtësisht të pashkelura për të përmirësuar jetën e tyre dhe njëkohësisht për të zgjidhur me shpejtësinë e “erës” probleme të cilat përndryshe kërkojnë shumë më tepër kohë e patjetër kanë një kosto të lartë.
Të ftuar ishin Idliri, Gejsi dhe Armandi. Ata folën për një element të jetës së përditshme që janë pagesat, në një vend ku sot 96 % e pagesave kryhen përmes parasë fizike, ndërkohë që sektori bankar vendos në dispozicion të qytetarëve kartat bankare. Në Shqipëri kemi kartat ViSA dhe MASTERCARD, të cilat janë faktikisht 1 % e volumit dhe përveçse janë 1 % e volumit kanë edhe një kosto pasi çdo transaksion i jep bankës një komision.
Në tryezë ishte edhe ministrja e Shteti për Sipërmarrjen dhe Klimën e Biznesit, Delina Ibrahimaj.
Kryeministri theksoi se prej disa kohësh po flitet për zgjidhjen e këtij problem përmes instrumenteve të botës së re.
Rama foli për marrjen e pensioneve në zarf dhe shtoi se ende sot kemi pamundësi për marrjen e pensioneve në arka.
“Këtu na vjen në ndihmë ajo që po ndodh sot në Shqipëri të cilën duam ta promovojmë. Po përgatisim një projekt pilot për të parë a funksionon një prurje e risisë së botës së re”, tha Rama.
“Reja” është një prej aplikacioneve që shkarkohet lehtësisht në telefona smart dhe i mundëson çdo individi të kryejë me lehtësi të gjitha pagesat nga shtëpia pa kosto shtesë.
“Është një kompani me investim tërësisht shqiptar, incentivë e ardhur nga një eksperiencë e një tregu të testuar të pagesave fizike. Investimi në FinTech është një kërkesë e kohës, që e bën jetën më të lehtë për konsumatorë e individët”, tha Grejsi.
Ministrja për Sipërmarrjen dhe Klimën e Biznesit, Ibrahimaj tha se “Reja” është kompani që tradicionalisht është marrë me remitancat, paratë që emigrantët kanë sjellë për familjet e tyre.
Ministrja tha se “përmes një projekti pilotë këto forma pagesash duam t’i testojmë gjerësisht për të gjitha pagesat”.
Grejsi bëri të ditur se fondet janë të sigurta dhe janë të paprekshme edhe nga institucionet, si përmbaruesit, etj.
“Nuk ka risk operacional as nga falimentimi i bankave. Licenca është me e kufizuar”, theksuan ata. /atsh/
