Ambasada e Arabisë Saudite në Tiranë ka shpërndarë një deklaratë të Riadit zyrtar lidhur me çështjen e nxehtë të zhdukjes së gazetarit Jamal Khashoggi, por pa e përfshirë në asnjë rresht emrin e tij.
Në deklaratë, fillimisht i vihet theksi faktit që Saudia e konsideron veten si lider të botës islame veç asaj arabe, një pozitë për të cilën historikisht ka qenë në garë me Turqinë, qysh kur në horizontin e historisë u shfaq Perandoria Osmane.
“Mbretëria e Arabisë Saudite, nisur nga roli i saj si lider i botës arabe dhe asaj islame, ka luajtur një rol të rëndësishëm gjatë gjithë historisë së saj, për thellimin e sigurisë, stabilitetit dhe prosperitetit të rajonit dhe mbarë botës, gjithashtu, ka bërë të gjithë përpjekjet në luftën kundër terrorizmit dhe radikalizmit, por edhe ka nxitur thellimin e bashkëpunimit ekonomik dhe vendosjen e paqes në rajon dhe në botë. Mbretëria vazhdon të punojë me shtetet simotra për përmbushjen e këtyre objektivave, bazuar në statusin e saj specifik, si toka ku u shpall revelata hyjnore dhe si busulla shpirtërore e muslimanëve”, thuhet në deklaratë.
Siç vihet re në rreshtat e fundit të kësaj pjesë të deklaratës, Riadi vë theksin dhe tek statusi i Mbretërisë, si vend ku lindi shpallja islame, si për të potencuar pozitën e saj të privilegjuar në botë.
Më pas, deklarata përqëndrohet te presionet në rritje këto ditë nga faktori ndërkombëtar, ku si shkak mbetet zhdukja e gazetarit kritik, për të cilin thuhet se ka hyrë por nuk ka dalë më, nga Konsullata saudite në Stamboll.
“Mbretëria e Arabisë Saudite i refuzon prerazi të gjitha kërcënimet dhe orvatjet për ta dëmtuar, si nëpërmjet mesazheve për vendosjen e sanksioneve ekonomike, ushtrimit të presioneve politike apo dhe përsëritjes së akuzave fallco, të cilat nuk do ta dëmtojnë pozitën e qëndrueshme dhe statusin e saj në nivel të botës arabe, islame dhe në nivel ndërkombëtar. Fundi i këtyre orvatjeve spekullative është dështimi total. Populli i Mbretërisë dhe qeveria e saj, do të mbeten kryelartë dhe të qëndrueshëm siç kanë qenë. Mbretëria thekson se çfarëdo mase e ndërmarrë ndaj saj, do të përballet me masa më të rënda, se ekonomia e Mbretërisë ka një rol jetik në ekonominë botërore dhe se ekonomia e saj nuk preket nga ajo globale”, thuhet në deklaratë.
Aty u jepet vlerësim disa shteteve që Riadi i quan “simotra”, të cilat sipas saj kanë mbajtur një qëndrim të matur, por pa e specifikuar se për kë është fjala.
“Mbretëria e vlerëson qëndrimin e simotrave të saj përballë kësaj fushate shpifjesh dhe akuzash të pabaza, ashtu siç çmon zërat racionalë në mbarë botën, atyre që forca e urtësisë dhe maturisë u triumfoi ndaj tendencës për t’u besuar thashethemet dhe akuzat, në shërbim të axhendave, objektivave dhe raporteve që nuk kanë asnjë lidhje me të vërtetën”, përfundon deklarata. /tesheshi.com/
