Të gjithë liderët europianë janë duke punuar në mënyrë që Athina të arrijë një marrëveshje me kreditorët e saj ndërkombëtarë. Lajmi është koondirmuar nga presidenti i Këshillit italian, Matteo Renzi, sapo është kthyer nga samiti i jashtëzakonshëm i Eurozonës në Bruksel.
“Mendoj se të gjithë bashkë duhet të punojmë që të arrihet një marrëveshje. Athina duhet të përballojë problemet e saj të natyrës ekonomike. Edhe Unioni duhet tu dalë zot detyrimeve të tij morale përballë një vendi të madh si Greqia. Nuk bëhet fjalë për diskutime vetëm të natyrës ekonomike, por edhe në lidhje me çfarë komuniteti duam për të ardhmen tonë”,- ka thënë Renzi.
Presidenti i Komisionit Europian, Jean-Claude Juncker ka thënë se me shumë mundësi,këtë javë do të firmoset një marrëveshje mes Greqisë dhe kreditorëve, edhe pse duhet edhe shumë punë deri në mbylljen e termave kontratualë.
Sipas Presidentit të Francës, Francois Hollande, propozimi i ri grek për kreditorët ndërkombëtarë përfshin një sërë përmirësimesh në krahasim me marrëveshjet e diskutuara në të kaluarën, por përsëri nuk kënq të gjitha kërkesat.
“Shpresoj që puna e bërë gjatë ditëve të fundit nga ana e Greqisë me institucionet të na çojë në një marrëveshje përfundimtare, e cila duhet të arrihet sa më parë të jetë e mundur”,- ka thënë ai për gazetarët. “Ka pasur përmirësime, por jo çdo gjë është zgjidhur”,- ka shtuar duke bërë me dije se asnjë vendim nuk do të merret mbrëmjen e sotme.
Edhe kancelaria gjermane Angela Merkel ka pohuar se deri më tani nuk ka asnjë të dhënë që të ndërmerren hapa gjigant dhe përfundimtarë brenda natës së sotme. /tesheshi.com/
