Në Kosovë jetojnë pak më shumë se 1.6 milionë banorë, gati 140 mijë më pak se sa ishte në regjistrimin e vitit 2011.
Këto janë të dhënat e publikuara nga Agjencia e Statistikave të Kosovës (ASK), të cilat i referohen rezultateve të para përfundimtare të regjistrimit të popullsisë, amvisërive dhe banesave për vitin 2024.
Është bërë vlerësim për komunat me shumicë serbe në veri të Kosovës, sepse popullata atje më së shumti e ka bojkotuar procesin e regjistrimit. Sipas atij vlerësimi, numri i përgjithshëm i banorëve në Kosovë është 1.602.515, transmeton Anadolia.
Në regjistrimin e vitit 2011, Kosova kishte 1,739,825 banorë, gati 140 mijë më shumë. Në të njëjtën kohë, sipas regjistrimit të vitit 1991, kishte 1.956.196 banorë.
Agjencia e Statistikave deklaron se 91,76 për qind e qytetarëve deklarohen si shqiptarë, 2,31 serbë, 1,69 boshnjakë, 1,22 turq, 1,02 ashkali, 0,57 egjiptianë, 0,58 goranë, 0,55 romë dhe 0,19 për qind.
Rezultatet e ASK-së tregojnë se mosha mesatare e femrave është 35.66 vjeç, ndërsa e meshkujve është 34.03 vjeç.
Struktura fetare
Sa i përket strukturës fetare të popullsisë, 93,49 për qind janë deklaruar si myslimanë, 2,31 për qind janë ortodoksë dhe 1,75 për qind janë katolikë.
Afro 0.5 për qind deklaruan se nuk i përkisnin asnjë feje dhe 0.45 për qind treguan një tjetër.
Sipas të dhënave të këtij regjistrimi, në periudhën shkurt 1998 deri në qershor 1999 janë vrarë 11.417 persona, 1.047 të zhdukur, 6.682 të plagosur dhe 3.312 të burgosur. Në të njëjtën kohë, 154.272 familje kanë pësuar dëme materiale gjatë luftës.
Sipas të dhënave të ASK-së, numri i popullsisë në zonat urbane është rritur në 50.2 për qind dhe ka tejkaluar për herë të parë popullsinë rurale, gjë që tregon lëvizjen e popullsisë drejt zonave urbane.
Sipas të dhënave aktuale të Agjencisë së Statistikave, në diasporë janë të regjistruar rreth 550 mijë persona.
Regjistrimi i popullsisë, amvisërive dhe banesave është bërë në të gjitha komunat e Kosovës nga data 5 prill deri më 24 maj. /tesheshi.com/
