Kryesuesit e kampionatit anglez arritën një tjetër fitore në javën e 18-të. Çelsi fitoi 3-0 këtë pasdite ndaj Bornmëthit falë pjekurisë më të madhe të treguar në fushë. Protagonist qe spanjolli Pedro, që shënoi dy prej golave, me një prej tyre të realizuar me 11-metërsh nga Hazard.
Fitorja e ngjit Çelsin në kuotën e 46 pikëve, i shkëputur ndjeshëm në vend të parë nga ndjekësit më të afërt.
Mançester Junajtedi, gjithashtu, mori tre pikë të vlefshme në përballjen ndaj Sandërlendit. Blind, Ibrahimovic dhe Mkhitaryan ishin shënuesit në fitoren 3-1. Goli i nderit për miqtë mban firmën e Borini-t, dhe u realizua në çastet e fundit të lojës.
Kjo qe fitorja e katërt radhazi e Mançester Junajtedit në kampionat, në vend të gjashtë në renditje, me 33 pikë.
E ngushtë dhe e siguruar në minutat finale të ndeshjes qe fitorja e Arsenalit ndaj Uest Bromuiçit. Giroud zhbllokoi rezultatin në minutën e 86-të. Fitorja 1-0 ndërpreu serinë negative të “topçinjve”, që i patën humbur dy ndeshjet e fundit.
Vuan fort Lestër Siti, që nga maja e Premier League-s sezonin e shkuar, tani e sheh veten thuajse në fund të klasifikimit.
Tjetër humbje për kampionët, që i dorëzohen këtë herë Evertonit. Rezultati 0-2 e zbret Lestërin në vend të 16-të, me vetëm tre pikë që e ndajnë prej zonës së rënies një kategori më poshtë. Kjo ishte humbja e nëntë në 18 javë për skuadrën e Ranieri-t, që mund të bëjë një tjetër surprizë këtë sezon nëse vazhdon kështu, duke zbritur në Championship. /tesheshi.com/
