Në një masë të re dhe të paprecedentë për të ndëshkuar Rusinë, që synon kufizimin e aftësisë së saj për të financuar luftën në Ukrainë, grupi G7, Bashkimi Evropian dhe Australia kanë filluar të zbatojnë një embargo ndaj importeve të naftës ruse nga deti.
Ndalimi pasoi një vendim për të kufizuar çmimin e naftës ruse në 60 dollarë për fuçi, të cilin Rusia e refuzoi, duke njoftuar se nuk do t’ua shesë naftën e saj vendeve që zbatuan masën. Ajo paralajmëroi gjithashtu pasojat e një vendimi të tillë për vendet e tjera.
Lufta energjetike mes Perëndimit dhe Rusisë vazhdon. Pas hyrjes në fuqi të vendimit për kufirin e çmimit të naftës ruse, transportuesit në Bashkimin Evropian nuk lejohen më të transportojnë naftë ruse nëse ajo nuk shitet në përputhje me kufirin e çmimit të vendosur nga G7 dhe Bashkimi Evropian, dhe jo me një çmim të përcaktuara nga tregu sipas raportit të ofertës dhe kërkesës, siç njihet dhe zbatohet rëndom.
Çfarë do të bëjë Rusia?
Sa i përket skenarëve që Rusia mund të ndërmarrë, Amer Al-Shobaki, një ekspert për çështjet e naftës dhe energjisë, shpjegoi se ka pak mundësi që Rusia të reduktojë prodhimin e naftës sepse ajo do të zvogëlojë të ardhurat e saj ekonomike, pasi Rusia nuk është në gjendje të rivendosë përsëri prodhimin e saj pa probleme.
Nga ana tjetër, analisti politik Evgeny Sidorov beson se Moska ka disa opsione, më e rëndësishmja prej të cilave është rritja e eksporteve të naftës në vende të ndryshme, kryesisht në Indi dhe Kinë, gjë që do të kompensonte disa nga humbjet e mundshme që mund të kishte si rezultat i vendosjes së një kufiri për çmimin e naftës ruse. Ka mënyra të tjera për të shmangur këtë vendim, por Rusia nuk po zbulon planet e saj të naftës. Gjithashtu, ajo është e gatshme dhe e aftë të përballet me atë hap, dhe gjithashtu do të mbështetet në aleatët e vjetër ose do të kërkojë klientë të rinj, tha ai.
Dr. Thierry Bros, profesor i ekonomisë në Institutin e Shkencave Politike në Paris, tha se Rusia mund ta shesë naftën e saj jashtë rajonit evropian, por çmimi do të jetë i ulët dhe do të shkaktojë humbje të mëdha. Prandaj, opsionet e saj janë ose të ndalojë eksportin e naftës së saj, e cila do të rrisë çmimet botërore dhe do t’i shërbejë interesave të OPEC-ut, ose të punojë në transportimin e naftës së saj duke ndjekur një strategji të operimit në fshehtësi pa zbuluar anijet e saj, e cila përsëri nuk është rrugë e sigurt.
Ekonomia ruse
Është e rëndësishme të theksohet se ekonomia ruse mbështetet shumë në të ardhurat nga eksportet e naftës dhe gazit, pasi ato përfaqësojnë 20.2 për qind të prodhimit kombëtar bruto të vendit, sipas statistikave për tremujorin e dytë të këtij viti.
Rusia ka sasinë e tretë më të madhe të rezervave të naftës në botë, e vlerësuar në 80 miliardë fuçi dhe është prodhuesi i pestë me rreth 11 milionë fuçi në ditë, gjysma e të cilave eksportohet jashtë vendit.
Përpjekjet e Rusisë për luftë në Ukrainë mbështeten shumë në këto të ardhura, pasi ato kontribuojnë 45 për qind në buxhetin e shtetit. Çmimi i naftës së papërpunuar ruse Urals aktualisht është rreth 65 dollarë për fuçi, që do të thotë se është vetëm pesë dollarë mbi kufirin e sipërm të çmimit. Prandaj, masat evropiane do të kenë një ndikim të kufizuar në ekonominë ruse në një periudhë afatshkurtër, ndërkohë që ekspertët ekonomikë në botë kanë frikë se vendosja e kufirit të sipërm mund të lërë gjurmë edhe në tregun global të energjisë dhe të çojë në çmime edhe më të mëdha “fryrëse”.
Duke komentuar vendimet evropiane, presidentja e Komisionit Evropian Ursula von der Leyen njoftoi në Twitter: “Ekonomia ruse po përjeton një gjendje gjithnjë e më kaotike. Ne do të vazhdojmë të rrisim presionin ndaj Kremlinit. Ne do të qëndrojmë pranë Ukrainës sot, nesër dhe për aq kohë sa të duhet”.
“Pas ushqimit dhe urisë, Putini tani ka vendosur ta kthejë dimrin në një armë. Ai dëshiron të ndërpresë furnizimin me energji elektrike, ngrohje dhe ujë për miliona civilë në të gjithë Ukrainën. Ne po përgjigjemi me paketën e nëntë të sanksioneve kundër atyre që luajnë një rol aktiv në këtë luftë brutale”, tha Josep Borrell, Përfaqësuesi i Lartë i Bashkimit Evropian për Politikën e Jashtme dhe Sigurinë. /tesheshi.com/
