Nga Bashkim Kastrati
Përfaqësuesja e Bashkimit Evropian në Prishtinë, Nataliya Apostolova ka deklaruar ditë më parë se Kosova duhet t’i përmbushë kriteret ekonomike të kërkuara nga Bashkimi Evropian, në mënyrë që të kualifikohet për tregun e përbashkët të BE-së.
Ajo ka thënë se programi i reformave ekonomike është shumë proces i rëndësishëm për BE-në. “Është boshti i qeverisjes ekonomike, si një prej tre shtyllave të strategjisë së zgjerimit”, tha Apostolova.
Sipas Apostolovas, kriteret ekonomike evropiane nënkuptojnë një ekonomi funksionale të tregut, që ka kapacitete t’i bëjë ballë konkurrencës brenda tregut të përbashkët të BE-së. Ajo ka deklaruar se Komisioni Evropian, për çdo vit, në Raportin për Kosovën, jep një pasqyrë të gatishmërisë dhe progresit në përmbushjen e kriterit ekonomik.
Ajo e ka rikujtuar Qeverinë e Kosovës se zbatimi i kritereve ekonomike është kërkesë kryesore për anëtarësim në Bashkimin Evropian.
Programi për Reforma në Ekonomike është miratuar nga Qeveria e Kosovës më 26 janar të këtij viti.
Komisioni Evropian publikon për çdo vit të gjeturat e Raportit Vendor që njihet si Raporti i Progresit, me anë të të cilit matë përparimin e vendeve pretendente për anëtarësim në Bashkimin Evropian drejt integrimeve evropiane dhe përcakton detyrimet për të përmbushur kriteret.
Kriteri ekonomik, është vetëm një nga kushtet e përcaktuara nga Komisioni Evropian për anëtarësimin e vendeve në BE.
BE ka kritere rigoroze në fushën ekonomike
Ekonomisti Lulzim Beqiri ka thënë për tesheshi.com se Kosova duhet t’i përmbushë kriteret ekonomike të kërkuara nga Bashkimi Evropian, në mënyrë që të kualifikohet për tregun e përbashkët të BE-së, pasi që siç dihet BE ka kritere rigoroze në fushën ekonomike, andaj edhe Kosova duhet të ecë me hapa të shpejtë në mënyrë që t’i plotësojë këto kritere.
“Jemi dëshmitarë se kriteret ekonomike janë të shumta në mesin e tyre janë: Stabiliteti makro-financiar, ambienti mirëpritës biznesor, tregjet funksionale të fuqisë punëtore dhe financiare, nivelet kualitative cilësore në arsim, në infrastrukturë, inovacion dhe integrim ekonomik”, thotë Beqiri.
Ai thotë se Kosova ka përmirësime në të gjitha kushtet që BE-ja ka bërë për Kosovën, por ende nuk ka rezultate të kënaqshme dhe se mbetet sfidë e madhe e Kosovës për t’i plotësuar këto kushto, e që nuk janë të pamundura vetëm duhet pune dhe seriozitet.
Klasa politike duhet t’i shtyjë përpara reformat ekonomike
Ekonomisti Mustafë Kadriaj thotë se Bashkimi Evropian në vazhdimësi ka tërhequr vërejtjen për institucionet vendore që pa i plotësuar kriteret si politike dhe ekonomike nuk ka dritë të gjelbër. Por sipas tij, me ketë klase politike dhe me këtë mënyrë të qeverisjes për fatin jo të mirë për perspektiven e Kosovës, ka pak shpresa, sepse qëllimi i kësaj klase politike nuk është perspektiva e Kosovës dhe qytetarëve por rehabilitimi i tyre dhe realizimi i interesave të tyre politike.
“Bashkimi Evropian nuk vepron sipas qejfeve të politikanëve tonë, por përmes kritereve që është diçka normale, sepse realizimi i kritereve është matës për përparimin e Kosovës drejt perspektives Evropiane. Për ekonominë dhe biznesin kosovarë ende i kemi shumë kritere që nuk janë plotësuar nga Kosova karshi MSA-së, po ashtu edhe bizneset vendore si rezultat i një ambienti të pafavorshëm biznesore përkundër tentimit që të jenë konkurrent me bizneset rajonale çdo ditë mbyllen biznese vendore si rezultat i importit të pakontrolluar si dhe kushteve jo të favorshme të të bërit biznes”, thotë Kardiaj.
Ai thotë se Bashkimi Evropian kriteret i veta i bënë sipas raporteve, e për fatin jo të mire Kosova nuk po e përmirëson ranglistën në raportet si vendore dhe ndërkombëtare dhe kjo drejtpërdrejt i bie barrë elitës politike dhe qeverisë se tanishme. /tesheshi.com/
