Një ngushëllim për ndarjen nga jeta të ish-presidentit Bush ka përcjellë dhe kreu i shtetit të Kosovës Hashim Thaçi. Ai ka kujtuar se ç’rol ka patur i ndjeri për Kosovë, që, në kohën kur ai drejtonte Shtëpinë e Bardhë, Millosheviçi kishte nisur luftrat e ushtronte repression mbi kosovarët.
“Ngushëllimet më të sinqerta në emër të popullit të Kosovës për vdekjen e Presidentit të 41-të të Shteteve të Bashkuara të Amerikës, George H.W. Bush. SHBA dhe bota do ta kujtojnë si patriot të pashoq dhe shembull të përkushtimit për të punuar për fuqizimin e demokracisë botërore dhe përhapjen e vlerave të lirisë. Kosova dhe shqiptarët do ta kujtojnë si president të parë, që qysh në fillim të viteve ‘90 ia bëri shumë qartë regjimit të Milosheviçit, me Vërejtjen e Kërshëndellave, se Kosova është vijë e kuqe për SHBA. Bashkëndjejmë me familjen Bush dhe tërë popullin amerikan në këtë humbje të madhe”, ka shkruar Thaçi.
Si për rastësi, një ditë më parë, Thaçi do postonte një foto me të birin, ish-presidentin George W. Bush. /tesheshi.com/
