Edinson Cavani duket se do ta lërë këtë verë kryeqytetin francez, me një numër skuadrash të mëdha që janë të interesuara për të.
Sulmuesi uruguajan u transferua tre vite të shkuara te PSG-ja, pasi u largua nga Napoli në Itali. Por në këta tre vite ai mbeti vazhdimisht në hijen e Ibrahimovic-it, duke mos bërë paraqitje fort të mira.
Cavani shënoi 19 gola në kampionatin francez gjatë këtij sezoni, saktësisht sa gjysma e golave të shënuar nga suedezi. Megjithatë, siç raportohet, klubi francez i ka shprehur besimin, duke i premtuar se do të jetë numri një në sulmin e kampionëve pas largimit të Ibrahimovic-it.
Mbrojtësi i Atletikos së Madridit, Diego Godin, e njëkohësisht bashkëlojtar me Cavani-n te përfaqësuesja uruguajane, ka treguar se ka biseduar me sulmuesin e PSG-së, e se ai do të ishte i kënaqur nëse i bashkohej skuadrës së kryeqytetit spanjoll.
“Cavani e do Atletikon, dhe ia pëlqen mënyrën e të luajturit, sepse është shumë e ngjashme me mënyrën si ne luajmë me ekipin kombëtar të Uruguajit. Ai do të qe i kënaqur të vinte këtu,” ka rrëfyer Godin.
Ekipe të tjera që e kërkojnë 29-vjeçarin janë Arsenali, Mançester Junajtedi dhe Juventusi. Ndërkohë, për t’i dalë së keqes përpara, PSG-ja i ka ofruar Cavani-t një zgjatje kontrate. /tesheshi.com/
