John Carew nuk vendosi të mbetet në sport pas përfundimit të karrierës si futbollist. Ai filloi një rrugë të re si aktor. Kurse, në projektin e ri ai e luan rolin e një mafiozi shqiptar në filmin me titullin “Hovdinger”
Shumica e futbollistëve pas përfundimit të karrierës vazhdojnë të jenë të angazhuar në sport. Disa prej tyre fillojnë shkollimin për t’u bërë trajnerë, por ka edhe të atillë që angazhohen si analistë në televizione të ndryshme ose edhe shndërrohen në menaxherë.
Mirëpo, ish-sulmuesi norvegjez, John Carew, ka vendosur të merret me diçka krejt tjetër. Ai ka filluar një karrierë të re si aktor e angazhimin më të ri e ka bërë në filmin e quajtur “Hovdinger”, përcjell Zëri.
Ky nuk është debutimi i Carew-it si aktor, pasi ai u paraqit për herë të parë para kamerave më 2013 në projektin e quajtur “Dead of Winter” e që është ndjekur në kinema të ndryshme në Norvegji.
Interesante është se në filmin e ri, Carew do ta ketë rolin e një mafiozi shqiptar me emrin Igor. Parapremiera e filmit u mbajt të premten në Oslo.
“Tashmë një kohë të gjatë më ka kapluar dëshira ta provoj veten në film. Në këtë film e luaj një kriminel të vrazhdët, e nuk ishte aspak e lehtë për mua sepse jam djalë shumë i mirë”, deklaroi Carew.
35-vjeçari kaloi një karrierë të suksesshme si futbollist. Por, tani shpreson ta ketë një të tillë si aktor. Në vend të mbrojtësve kundërshtarë, ai tani e tutje do të jetë në aksion të natyrës tjetër, para kamerave.
Sulmuesi shënoi 40 gola gjatë aventurës në Angli, por karriera e tij si aktor përfshin goditje tjera, e në fakt të shtëna, si anëtar i një grupi kriminal.
“Është një rol interesant dhe argëtues. Mund ta krahasoj vetëm me Will Smith dhe The Rock”, u shpreh ai. Carew ka ndjekur hapat e futbollistëve që u bënë aktorë, në mesin e të cilëve janë Frank Lebouef, i cili luajti një doktor në filmin “The Theory of Everything”, Stan Collymore, i cili bëri një paraqitje në “Basic Instinct 2” dhe “Escape of Victory” ku u paraqitën Pele, Bobby Moore dhe John Wark.
Karriera si futbollist
Edhe pse si aktor, Carew është ende në fillim të karrierës. Si futbollist ai luajti për shumë skuadra të njohura evropiane. Kurse, ishte edhe sulmues i rëndësishëm i Kombëtares norvegjeze.
Carew luajti për skuadra si Valencia, Roma, Besiktas, Olympique Lyon, Aston Villa e Stoke City, para se të përfundonte karrierën si futbollist më 2013. /tesheshi.com/
