Siç njofton agjencia e lajmeve Reuters, në kuadër të diskutimeve mbi qëndrimin apo daljen e Britanisë nga BE-ja, një zëdhënës i kryeministrit britanik ka deklaruar dje se, nëse votuesit vendosin ta lënë unionin, mijëra refugjatë mund të vërshojnë nga Franca.
Sipas tij, dalja nga blloku mund të dëmtojë marrëveshjen me Francën, e cila i lejon ruajtësit britanikë të kufirit t’i bëjnë që atje kontrollet e emigracionit.
I të njëjtës ide ka qenë dhe vetë David Cameron në një konferencë shtypi, ku i ka mëshuar po këtij fakti: “Ju e dini se kufijtë qëndrojnë në Kale (Calais), ju e dini se kemi një ndenjëse që përcakton rregullat kur vjen puna për të ardhmen e Europës, ju e dini se kemi informacion jetik në kemi të bëjmë me terroristë apo kriminelë që udhëtojnë nëpër Europë, sepse jemi pjesë e atyre organizatave.”
Kryeministri britanik do të thoshte po ashtu se në Francë ka mjaft politikanë të opozitës që do të donin të prishej ajo marrëveshje, çka do t’u hapte portat mijëra refugjatëve të cilët jetojnë në të ashtuquajturën “xhungël” të Kalesë për të vërshuar drejt Britanisë.
Në Britani do të ketë në muajt në vazhdim një referendum mbi qëndrimin e mëtejshëm në BE, dhe deklarimet e mësipërme janë cilësuar nga kritikët si nisje e një “fushate frike” për t’i mbajtur qytetarët britanikë brenda bllokut. /tesheshi.com/
