Drejtori i Përgjithshëm i Policisë së Shtetit, Haki Çako, në një prononcim të shkurtër për gazetarët i ka kthyer përgjigje Lëvizjes Socialiste për Integrim, e cila një ditë më parë kërkoi shkarkimin e tij nga detyra. Çako tha se drejton një organizatë të depolitizuar me ligj dhe do të vazhdojë të jetë në krye të detyrës, për sa kohë është duke e zbatuar atë me përpikmëri maksimale.
“Unë jam drejtuesi i Policisë së Shtetit, në bazë të Kushtetutës, Kodit dhe të gjitha akteve të tjera normative. Jam autoriteti i drejtimit të policisë, por jo lider i subjekteve politike, nuk më lejohet të prononcohem, pavarësisht nga korentet politike dhe interesave të caktuar politike. Përveç faktit që po drejtoj një organizatë të depolitizuar me ligj, jam në krye të detyrës dhe do të vazhdoj të jem në krye të detyrës, për sa kohë jam duke e zbatuar atë me përpikmëri maksimale dhe jam duke ndjekur të gjithë procesin zgjedhor. Policia e Shtetit sot, është një ndër institucionet e besueshmërisë më të lartë në sigurimin dhe menaxhimin e këtij procesi, i cili monitorohet në mënyrë të vazhdueshme, të detajuar, nga qendra në bazë, nga të gjithë aktorët” tha Cako.
Më tej, numri një i policisë u shpreh se transparenca e kësaj të fundit është maksimale dhe në një bashkëpunim të jashtëzakonshëm me prokuroritë respektive të rretheve gjyqësore dhe me Prokurorinë e Përgjithshme, për çdo veprim të kryer nga policia./tesheshi.com/
