Refuzimi që presidenti Meta i bëri bëri emrit të Genti Cakajt si ministër i Jashtëm, është qartësuar tashmë si një akt politik më shumë se ligjor. Është vetë kreu i shtetit ai që në një reagim të tijin, e bën të qartë arsyen e mosdekretimit: kufijtë. Pra, sipas Metës, Cakaj është mbrojtës i tezës së korrigjimit të kufijve.
“Pavarësia, integriteti territorial i #Kosovës dhe vendimi i Gjykatës Ndërkombëtare të Drejtësisë @CIJ_ICJ janë të #padiskutueshme për Republikën e #Shqipërisë deri në sekondën e fundit si #President i vendit tim”, shkroi Meta.
Ka pasuar një reagim përshëndetës ndaj këtij akti prej Edita Tahirit, ish-kryesueses së delegacionit të bisedimeve me Beogradin, e cila e quan aktin e Metës si ‘kombëtar”, ndërsa emërimin e Cakajt si një djallëzi të Ramës.
“E pershendes vendimin kombetar dhe vizionar te Presidentit te Shqiperise ne mbrojtje te kufijve te Kosoves. Ai sot nuk dekretoi nje kandidat per minister te jashtem qe ishte pro prekjes se kufijve, te nominuar qellimshem dhe me djallezi nga kryeministri Rama“, shkroi Tahiri.
Reagoi Rama më pas, duke ironizuar politikanen kosovare dhe vetë kreun e shtetit.
“Ah edhe Edita Tahiri, bashkuar me ca qyqarë që salutojnë vendimin e vizionarit IM! Ah çfarë llumi mllefi e terri që “vizionarët”e kësaj kategorie e jashtëqesin si lumë dashurie për kombin! Genti e dashur Edita i meriton sulmet tuaja aq sa këta “vizionarë” emrin njeri! Po ti xhan?”, shkroi Rama. /tesheshi.com/
