Një hendek prej rreth 200 metra me 7 metra gjatësi është hapur në Lungarno Torrigiani, mes Ponte Vecchio e Ponte alle Grazie, në qendër të Firences në Itali. Rënia e rrugës ka ndodhur rreth orës 6:30 të mëngjesit dhe ka dëmtuar 20 makina që kanë qenë të parkuara në rrugë. Pas kësaj ngjarje janë marrë masa paraprake dhe janë evakuuar dy pallatet që ndodheshin aty pranë.
Humnera në rrugë, siç raportojnë zjarrfikësit, ishte shkaktuar si pasojë e thyerjes së një tubi të madh uji, çka ka bërë që makinat e parkuara në rrugë të bien në një gropë të vetme, siç shikohet në foto.
Fatmirësisht, asnjë person nuk është dëmtuar nga kjo ngjarje. Policia ka mbërritur në vendngjarje dhe ka bllokuar trafikun në këtë zonë. “Rreth mesnatës janë thirrur forcat zjarrfikëse dhe është verifikuar se ishte çarë një tub i madh i ujit të pijshëm. Në orën 1:30 ka qenë pika më kulmore e punës, pasi u ça tubi me diametër 70 centimetra. Rreth orës 6:14 ndodhi rrëshqitja e rrugës”, – ka thënë kryebashkiaku Dario Nardella. /tesheshi.com/
