Jo larg çadrës së opozitës në bulevardin kryesor të Tiranës, ndodhet dhe çadra e Cirkut Kombëtar e cila rrezikon mbylljen për shkak të pronarit të tokës ku është ngritur e qëndron prej vitesh.
Një ekip përmbaruesish shkoi sot në drejtorinë e cirkut me një vendim gjykatë për lirimin e hapësirës – tokë që i përket Astrit Veliajt – por që nga drejtues të saj iu është thënë se pa një vendim nga Kryemnistria dhe Ministria e Kulturës prej së cilëve varet si institucion kombëtar, nuk mund të ndërmarrin asnjë veprim për uljen e çadrës dhe largimin që aty.
Ndërkohë, disa artistë të njohur cirku, nga ata që sot përbëjnë veteranët e çadrës, u shprehën të përlotur se do bënin çmos që cirku mos largohej që aty, vendi ku ka qëndruar e qëndron prej dekadash.
Cirku Kombëtar, i quajtur dikur si Cirku i Tiranës, vijon rregullisht aktivitetin me kontigjentin e brezit të të rinjve, duke dhënë shfaqje çdo fundjavë në mbrëmje. /tesheshi.com/
