“Butrinti”, sërish shpëtimtar jetësh me “vdekjen për dore”

Nga ministri i Mbrojtjes Niko Peleshi raportohet se anija shqiptare “Butrinti” ishte sërish pjesë e një operacioni shpëtimi emigrantësh në detra. Më saktë, prej saj u shpëtuan 52 emigrantë nga Sudani dhe Jemeni nga një gomone në rrezik në brigjet turke, falë bashkëpunimit mes Rojës Bregdetare greke dhe asaj turke.

Ministri Peleshi ndau foto nga ky operacion, duke thënë kjo është “një tjetër histori suksesi nga efektivët tanë të anijes ‘Butrinti’”

“52 emigrantë nga Sudani dhe Jemeni u shpëtuan nga një gomone në rrezik në brigjet turke, falë bashkëpunimit mes Rojës Bregdetare greke dhe asaj turke”, theksoi ai.

“Ky operacion i suksesshëm tregon rëndësinë e bashkëpunimit dhe koordinimit mes vendeve në luftën kundër emigracionit të paligjshëm dhe trafikut të njerëzve”, u shpreh Peleshi.

“Krenarë që efektivët tanë, pjesë e misionit SNMG2 TU 01, vazhdojnë të bëjnë një punë të jashtëzakonshme dhe të jenë shembulli më i mirë i përkushtimit dhe sakrificës”, janë fjalët e kreut të mbrojtjes shqiptare. /tesheshi.com/