Kreu i diplomacisë shqiptare, Ditmir Bushati ka deklaruar në Zërin e Amerikës se Shtëpia e Bardhë është alarmuar nga sulmi ndaj ambasadorit amerikan në Tiranë, Donald Lu, duke u shqetësuar nga zgjerimi i një mjedisi anti-SHBA..
“Në të kaluarën kemi parë sulme sporadike kundër ambasadorëve amerikanë, në Tiranë për shembull, ndërsa tani shikojmë një fushatë të orkestruar kundër rolit të ambasadave amerikane në Shqipëri, Maqedoni, Mal të Zi dhe Serbi. Kjo po bëhet mjaft e rrezikshme, sidomos në situatën me të cilët përballet Bashkimi Evropian si dhe duke mbajtur parasysh faktin që ambasadat amerikane kanë mbështetur mjaft reformat për sundimin e ligjit në vendet tona”, tha Bushati.
Ministri i Jashtëm, përveç Shtëpisë së Bardhë, ku ka takuar zv.këshilltaren e Trump për Sigurinë Kombëtare, ka zhvilluar një takim edhe me drejtues të Pentagonit, por kjo vizitë është mbajtur jashtë reflektorëve të medias.
Ndërkaq, Bushati foli për rolin e Rusisë të cilin e quajti të rrezikshëm. Pikërisht për këtë aspekt, takimet në SHBA kanë pasur rëndësi të veçantë.
“Mund të shihet se Rusia po tregohet mjaft agresive në bashkëpunimin e saj me Kishën Ortodokse, me mediat, me aktivistë të shoqërisë civile, me parti politike. Kemi parë gjithashtu se Rusia po tregohet mjaft aktive me deklaratat lidhur me zhvillimet në Maqedoni. Ka patur shumë më tepër deklarata të bëra nga Rusia se sa nga Departamenti i Shtetit apo nga Brukseli lidhur me zhvillimet në Maqedoni,” tha Bushati për VOA-n.
Shqipëria prej kohësh po furnizon me municion artilerie luftëtarët kurdë- pershmergë në Siri, që përbëjnë pjesë të frontit anti-ISIS dhe opozitarë të Bashar al Asadit. /tesheshi.com/
