Një zyrtar i lartë ukrainas i sigurisë tha se ishte e mundur që aeroplani me pasagjerë që u rrëzua në Iran, m’u në çastin kur po lëshoheshin raketa në drejtim të bazave amerikane në Irak, u qëllua nga një raketë ruse.
Aeroplani ra në atmosferën e përshkallëzimit të tensioneve midis Teheranit dhe Uashingtonit, duke vrarë të gjithë 176 pasagjerë dhe ekuipazhin, e dyshimet qenë se rrëzimi mund të kishte lidhje me këtë zhvillim në sfond.
Një ekip prej 45 ekspertësh ukrainas mbërritën në kryeqytetin iranian për të parë pse një aeroplani i International Airlines u rrëzua pak minuta pasi u ngrit nga aeroporti “Imam Khomeini”, tha Oleksiy Danilov, sekretari i përgjithshëm i Këshillit të Sigurisë Kombëtare dhe Mbrojtjes së Ukrainës.
Mund të merret në konsideratë mundësia që “avioni u godit nga një raketë Tor(ruse)”, tha ai.
Moska e ka furnizuar Teheranin me armë të sofistikuara për dekada, dhe Irani testoi raketat ruse Tor-M1 në 2007.
Arsyet e tjera të mundshme për përplasjen përfshijnë një “shpërthim në aeroplan si rezultat i një sulmi terrorist”, një përplasje me një objekt tjetër fluturues ose një shpërthim të një prej motorëve, shtoi ai.
Ekipi ukrainas “synon të kërkojë mbetjet e mundshme të raketës ruse Tor”, tha Danilov.
Në të njëjtën kohë, mediat amerikane raportuan se aeroplani ukrainas u godit nga një raketë Tor-M1 e prodhuar nga Rusia, duke cituar zyrtarë të pa emër të Pentagonit si dhe shërbimet e inteligjencës amerikane.
Një zyrtar amerikan i tha Reuters se satelitët amerikanë zbuluan lëshimin e dy raketave pak para se avioni të binte, pasuar nga një shpërthim. /tesheshi.com/
