Përballë krizës së thellë ekonomike në vendin e tyre, të paktën 11 mijë kompani greke kanë gjetur “parajsën” në Bullgarinë fqinje, ku jepen rroga të ulëta e që është edhe vendi më i varfër i Bashkimit Europian.
“Kemi gjetur stabilitet këtu, taksa të mira, legjislacion të shëndetshëm dhe një mjedis të përshtatshëm”, thotë Ioannis Politis, menaxheri i një kompanie greke.
Rreth 120 biznese të mëdha greke punojnë në Bulgari që prej vitit 2000 në sektorë si metalurgjia, karburantet, ndërtimi dhe pronat e paluajtshme.
E nëse kriza greke i dha fund emigracionit të bizneseve të mëdha në vitin 2009, një numër gjithnjë e më i madh kompanish greke, të vogla dhe të mesme, sidomos ato që tregtojnë me Europën, Ballkanin dhe Rusinë, kanë vijuar të zhvendosen në Bullgari për të shfrytëzuar taksat më të ulëta që aplikon ky vend.
Kostas Mikhail u largua nga Athina në vitin 2014 për të hapur një ëmbëltore në Sofje. Bashkëkombasi i tij Panagiotis Douvos u zhvendos në vitin 2011.
“Bullgaria më dha mundësinë të mbijetoj, që është e vështirë në Greqi këto kohë”, tha ai për AFP, duke folur mes shisheve të vajit të ullirit dhe sallamerisë në dyqanin e tij në qendër të Sofjes.
Kriza në Athinë gjithashtu ka bërë që edhe kapitali grek të vijë në Bullgari. Kompanitë greke investuan, sipas Institutit për Ekonominë në Sofje, deri në 5 miliardë euro në gjashtë vjet në ekonominë bullgare.
Ndërkaq, 50 mijë deri në 60 mijë grekë kanë hapur llogari bankare në bankat bullgare për të njëjtën periudhë.
Në fakt, 2015 nuk solli transferim kapitalesh dhe asnjë të mirë tjetër për Bullgarinë, pasi “loja tashmë kishte mbaruar”.
Tashmë Bullgaria po merr masa që kriza e bankave në vendin fqinj të mos prekë sistemin e saj. Sipas autoriteteve, bankat bullgare janë të sigurta.
Bullgaria vetë falimentoi për shkak të borxhit në vitin 1990 pas rënies së komunizimit dhe ishte sërish në prag falimenti në vitet 1996-1997 pas kolapsit të 14 bankave.
Regjimi i masave shtrënguese imponuar në atë kohë e ndihmoi vendin të dalë nga kriza dhe të bëhet një nga vendet më shembullore sa i takon disiplinës fiskale në Bashkimin Europian.
Autoritetet thonë se nuk ka asgjë për t’u trembur në Bullgari nga kriza greke, përveç histerisë artificiale për infektim nga Greqia. /tesheshi.com/
