Ndryshe nga amabasadori Soreca, i cili tha se duhet të jenë vetë palët që ta zgjidhin ngërçin kushtetues, në Bruksel, zëdhënësja Koçijançiç doli për ta thënë qëndrimin e BE-së, i cili, siç kuptohet dhe nga një reagim i zëdhënësit të Presidencës, ka qenë kundër lëvizjeve të Metës.
“Reforma në drejtësi e miratuar unanimisht nga Parlamenti me ndryshimet kushtetuese dhe legjislative të vitit 2016 kishte konceptuar renditjen teknike nga Këshilli i Emërimeve në Drejtësi, kufizimin e diskrecionit të organeve të emërimit me tre kandidatët e parë më të kualifikuar, si dhe zbatimin e mekanizmit zhbllokues pas skadimit të një afati 30-ditor, si mjete të rëndësishme për të forcuar parimin e pavarësisë së institucioneve të drejtësisë, në veçanti të Gjykatës Kushtetuese, si dhe parimet e objektivitetit, meritokracisë dhe vazhdimësisë institucionale në lidhje me emërimin e zyrtarëve të sistemit të drejtësisë.
Një interpretim që nuk i pranon këta elementë thelbësorë të mekanizmit të emërimit, siç përcaktohet në Kushtetutë dhe ligjet përkatëse, vë në pikëpyetje parimin e shtetit të së drejtës”, tha zëdhënësja e Brukselit.
Pas këtij qëndrimi, Koçijançiç, referon edhe për këtë rast, zgjidhjen nga Venecia.
“Në mungesë të një Gjykate Kushtetuese funksionale që mund të vendosë mbi këtë interpretim të papajtueshëm, rekursi për një mendim të Komisionit të Venecias duket si një zgjidhje efektive për ta trajtuar këtë situatë si një çështje me përparësi”, përfundon deklarata e zëdhënëses të BE-së.
I menjëhershëm ka qenë reagimi ndaj saj, ku zëdhënësi i Presidencës, e ka quajtur atë të “keqpërdorur nga Rilindja”. “Maja të lexojë Kushtetutën në shqip dhe të mos keqpërdoret nga Rilindja për lajme dite!”, shkruan zëdhënësi i Metës, Tedi Blushi. /tesheshi.com/
