Korrupsioni vijon të mbetet gangrenë në Shqipëri, sipas asaj çfarë thuhet në një draft të progres-raportit për vitin 2023.
“Pavarësisht disa përparimeve dhe përpjekjeve të vazhdueshme në luftën kundër korrupsionit, duke përfshirë një numër dënimesh të nivelit të lartë dhe hetime financiare në nivel të lartë, sërish mbetet një fushë me shqetësim serioz. Në përgjithësi, korrupsioni është i përhapur në shumë fusha të jetës publike dhe të biznesit dhe masat për parandalimin e tij vazhdojnë të kenë një ndikim të kufizuar, veçanërisht në sektorët vulnerabël”, thuhet në draft.
Edhe narrativa qeveritare më shumë i mëshon ndëshkimit se sa frenimit të korrupsionit. Frenimi, më shumë se me ndëshkim vjen me edukim.
Më tej në raport i mëshohet zgjedhjeve të 14 majit, ku mazhoranca korri një fitore gati absolute për një vend me pluralizëm politik.
“Ka shqetësime për keqpërdorimin e burimeve publike si në nivel kombëtar ashtu edhe në atë vendor, pretendime për presion mbi votuesit dhe punonjësit e sektorit publik dhe pretendime për blerje votash. Të gjitha këto duhet të hetohen siç duhet”, thuhet në draft-raportin e Brukselit.
Ndërsa sa i përket jetës politike, theksi vihet te shkak-pasoja e një opozite në krizë ndarjeje të thellë brenda vetes.
“Aktiviteti parlamentar vazhdoi të ndikohej nga polarizimi politik, në sfondin e përçarjeve të thella të vazhdueshme brenda partisë më të madhe opozitare”. /tesheshi.com/
