Zonja në krye te diplomacisë europiane, Federica Mogherini, i është shmangur në mënyrë diplomatike kolmenteve mbi çështjen “Tahiri”.
Gjatë një konference të përbashkët shtypi në Bruksel me kreun e diplomacisë së Tiranës, Ditmir Bushati, kryediplomatja e Brukselit tha: “Është rregullimi i artë të mos komentoj për hetimet që vazhdojnë. Nuk është korrekt që asnjë institucion të komentojë punën e një gjyqësori. Kultivimi i drogës dhe trafikimi duhet të trajtohet në mënyrë serioze me të gjithë mbështetjen politike dhe autoritetet gjyqësore të bëjnë punën e tyre. Shikoj vendosmëri, hapa përpara dhe vullnet politik. Sigurisht që duhet të shohim rezultate të qarta, jo se ky është kusht i BE-së por kusht i popullit shqiptar. Krahasuar me vitin e kaluar ka pasur progres por duhet konsoliduar dhe do të vazhdojë.”
Sakaq, duke vlerësuar reformat e ndërmarra nga qeveria “Rama”, Mogherini e vlerësoi 2018-ën, si vit me plot shanse për çeljen e negociatave.
Të njëjtën gjë shprehu dhe ministri Bushati nga ana e tij: “Presim që 2018-ta të jetë një vit vendimtar për Shqipërinë dhe ne besojmë se hapja e bisedimeve për integrim do të na ndihmojë. Reforma në drejtësi është një mundësi unike. Diskutuam edhe rezultatet e arritura edhe për luftën kundër krimit të organizuar, edhe këto rezultate janë një produkt i përbashkët edhe me agjencitë ligjzbatuese evropiane. E gjitha kjo dëshmon vullnetin tonë. Arritjet tona përbëjnë një bazë solide për të ardhmen e vendit dhe në kuadër të negociatave”.
Qëndrimet e dyshes Mogherini – Bushati, u shprehën gjatë një konference të përbashkët shtypi në Bruksel. /tesheshi.com/
