Në tërë Mbretërinë e Bashkuar ka nisur votimi për zgjedhjet e përgjithshme në vend, me britanikët që do të vendosin nëse do të vazhdojnë të qeverisen nga konservatorët e kryeministres Theresa May apo do t’u japin pushtet laburistëve të Jeremy Corbyn-it.
Konservatorët shihen si më të avantazhuar, por diferenca mes partive rivale është ngushtuar fort ndërsa fushata iu afrua fundit.
Këto janë zgjedhjet e dyta të përgjithshme brenda dy viteve, dhe fituesit do të duhet të negociojnë daljen e vendit nga BE-ja.
Rezultatet fillestare pritet të mësohen në orët e para të së premtes; në pasditen e së njëjtës ditë shpresohet të bëhen të ditura shifrat përfundimtare.
Rreth 46.9 milionë votues të regjistruar mund të votojnë në më shumë se 40.000 qendra votimi të hapura në tërë Britaninë.
Ata do të zgjedhin me votën e tyre 650 ligjvënës; 326 vende duhet të fitojë një parti për të patur shumicën në Dhomën e Komuneve. /tesheshi.com/
