Britania hodhi poshtë si të rreme pretendimin e presidentit rus Vladimir Putin se vetëm një pjesë e grurit të eksportuar nga Ukraina sipas një marrëveshjeje ndërkombëtare arrin në vendet e varfra.
Putin tha të mërkurën, pa përmendur burime specifike, se vetëm 2 nga 87 anijet, me 60,000 tonë produkte, shkuan në vendet e varfra. Marrëveshja për të eksportuar grurë nga portet ukrainase të Detit të Zi, e ndërmjetësuar nga Kombet e Bashkuara dhe Turqia, hyri në fuqi muajin e kaluar.
Duke cituar shifra nga Kombet e Bashkuara, Ministria Britanike e Mbrojtjes tha se rreth 30% e grurit të eksportuar sipas marrëveshjes ka arritur në vendet me të ardhura të ulëta dhe të mesme në Afrikë, Lindjen e Mesme dhe Azi.
“Rusia po ndjek qëllimisht një strategji dezinformimi pasi kërkon të shmangë çdo përgjegjësi për pasigurinë ushqimore, të njollosë besueshmërinë e Ukrainës dhe të minimizojë kundërshtimin ndaj pushtimit të saj”, tha ministria britanike në një postim në Twitter. /tesheshi.com/
