Kryeministrja britanike do të vizitonte javë më parë Ankaranë, me një axhendë të qartë për t’u dhënë shtysë marrëdhënieve tregtare mes dy vendeve duke patur në sfond daljen e Britanisë nga BE-ja. Në të njëjtën suazë, Theresa May do të vizitojë nga sot Jordaninë dhe Arabinë Saudite.
Britanisë i është bërë e qartë se nuk do të ketë diskutime mbi një marrëveshje të re tregtare me BE-në përpara se të ketë përparim në bisedimet për Brexit-in, çka e ka shtyrë shefen e qeverisë britanike të kërkojë forcimin e marrëdhënieve tregtare me ato vende që nuk janë pjesë e unionit.
“Ne duhet të shohim sfidat që kemi përpara dhe të ndërtojmë partneritete të fuqishme me vende që do të jenë jetike për sigurinë dhe begatinë tonë,” ka deklaruar May.
Ajo e ka parë si në interes të Britanisë mbështetjen e këtyre dy vendeve në luftën kundër terrorizmit dhe në krijimin e stabilitetit në rajon.
Arabia Saudite është partneri më i madh tregtar i Britanisë në Lindjen e Mesme.
“Ka aq shumë që mund të bëjmë së bashku për tregtinë, me potencialin e jashtëzakonshëm që investimet saudite të sigurojnë një shtysë për ekonominë britanike,” do të shprehej një ditë më parë kryeministrja.
Dy vendet kanë në të njëjtën kohë kontrata me peshë me kompanitë britanike në fushën e mbrojtjes. May pritet që të garantojë një mbështetje të re për forcën ajrore luftarake të Jordanisë në vizitën e sotme. /tesheshi.com/
