Partia Konservatore në pushtet dhe partia Laburiste opozitare, pësuan humbje të rënda në zgjedhjet për Këshillat Lokale që u mbajtën të enjten, pasi votuesit i ndëshkuan për qorrsokakun Brexit.
Përfituesit më të mëdhenj të zgjedhjeve janë Liberaldemokratët të cilët kanë marrë shumë Këshilla, dikur të udhëhequra nga Konservatorët dhe Laburistët.
Fitorja e tyre perceptohet një ndryshim në opinionin publik, pasi qytetarët refuzuan dy partitë kryesore të Britanisë së Madhe.
Përveç Liberaldemokratëve edhe Partia e Gjelbër dhe lista e të pavarurve arritën rezultate të kënaqshme.
“Mendoj se njerëzit janë të pakënaqur. Njerëzit të cilët votuan për mbetje (në BE), na akuzojnë për braktisje (të Unionit) ndërsa njerëzit që votuan për dalje, na fajësojnë sepse ende nuk kemi dalur”, tha për të përditshmen The Guardian, Tim Warren, një këshilltar i Konservatorëve të mposhtur.
Analizat e humbjeve dhe fitoreve në zgjedhjet lokale flasin se Partia Konservatore ka humbur 329 vende në Këshillet Lokale, ndërsa Partia Laburiste ka humbur 80.
Nga ana tjetër, Liberal Demokratët fituan 228 vende, Partia e Gjelbër ka fituar 33 dhe të pavarurit 181 Këshilltarë Komunal më shumë.
Konservatorët pritnin një rezultat të tillë, meqë shumë deputet të kësaj partie pranojnë se humbja reflekton zhgënjimin e votuesve nga përpjekjet e dështuara të qeverisë për të realizuar Brexitin, ndërsa laburistët prisnin të dënohen për qëndrimin e paqartë të tyre për Brexitin.
Zgjedhjet lokale konsiderohen si një referendum për partitë më të mëdha, lidhur me trajtimin që ia bënë procesit të largimit të Britanisë së Madhe nga Bashkimi Evropian. /AA/tesheshi.com/
