“Bota serbe” u përmend si koncept për herë të parë në shtator të vitit 2020 dhe që nga ajo kohë në Ballkanin Perëndimor ka pasur paralajmërime se ajo frazë rikujton aspiratat e politikës zyrtare serbe që pati rol kyç në shpërbërjen e përgjakshme të ish-Jugosllavisë në fillim të viteve 1990, thotë REL.
Toby Vogel, ekspert në Këshillin e Politikave të Demokratizimit mendon se ky në fakt është “një vazhdim i projektit të ‘Serbisë së madhe’ të Sllobodan Millosheviçit, por që mbase tani bëhet me mjete paqësore dhe artikulim të vizionit të presidentit Aleksandar Vuçiç, si lider i të gjithë serbëve”.
Duke pasur parasysh atë që ndodhi në vitet 1990, është e qartë se kjo gjithmonë do t’i bëjë fqinjët e Serbisë jashtëzakonisht nervozë, dhe për këtë kanë arsye, sepse ajo është një ide destabilizuese”, shprehet Vogel.
Muajin e kaluar, presidenti kroat Zoran Millanoviç deklaroi se është detyrë e tij që t’u tregojë partnerëve perëndimor kërcënimet nga ideja e “Botës serbe”.
Ai këto komente i bëri gjatë takimit në Zagreb me presidentin e Malit të Zi, Millo Gjukanoviç, i cili tha se ky koncept është eufemizëm për politikën e ‘Serbisë së madhe” dhe se është detyra e tij ta tregojë këtë në forumet ndërkombëtare.
