Të shtunën, një gorillë është qëlluar për vdekje për t’i shpëtuar jetën një vogëlushi, i cili kishte rrëshqitur në kafazin e tij, në një kopsht zoologjik në Sinsinati.
Kanë pasuar debate, polemika, kritika dhe komente të panumërta nëpër rrjetet sociale se si është dashur të menaxhohet me rastin në fjalë.
Menaxhmenti i kopshtit zoologjik ka mbrojtur aktin e ekzekutimit të gorillës duke thënë se ishte një situatë ku jeta e vogëlushit ndihej e kërcënuar.
Një hetim penal është ndërmarrë për këtë rast; ndërsa nëna e djalit ka marrë kritika raciste dhe kërcënime me vdekje lidhur me neglizhencën ndaj birit të saj. Gjithashtu është hartuar dhe një peticion me moton “Drejtësi për Haramben”, i nënshkruar nga 400.000 njerëz; gjithnjë në solidarizim me gorillën.
Por ndërkohë, javën e kaluar, mbi 1000 njerëz kanë vdekurve gjatë një udhëtimi të rrezikshëm përgjatë detit Mesdhe, në përpjekje për të arritur në Evropë.
Një mjek aktivistnga Gjermani nga organizata “Sea Watch’’ është fotografuar të premten tek po mbante në duar një vogëlush, i cili linte përshtypjen se është duke fjetur gjumë
Fëmija në fakt është nxjerrë i vdekur nga ujërat e Mesdheut, pasi anija prej drurit ishte fundosur, e me ç’rast 44 trupa tjerë ishin nxjerrë nga uji në breg.
Në një email dërguar Reuters, ky mjek aktivist i cili prezantohet si Martin, pa e përmendur mbiemrin e tij, pos tjerash shkruan:
“Si një kukull…e kapa dorën e fëmijën dhe me kujdesin më të madh e tërhoqa trupin e tij të lehtë në duart e mia, pothuajse si të ishte i gjallë. Po mbante duart e tij me gishtat e ngritur lart kah qielli, ndërkohë që dielli po shndërriste në sytë e tij miqësorë por të palëvizshëm. Përnjëherë fillova të këndoj, për ta qetësuar dhe ngushëlluar veten dhe për t’i dhënë kuptim këtij momenti, ku çdo gjë më dukej e pakuptimtë dhe po më kaplonte një ndjenjë që po ma copëtonte zemrën, kur po mendoja se vetëm 6 orë më herët ky fëmijë ishte akoma i gjallë…”
Më shumë anije të stërmbushura dhe të pasigurta llogaritet se po trafikojnë njerëz në udhëtimin detar prej Libisë për në Itali, gjatë përpjekjeve të tyre për të vazhduar rrugën për ndonjë vend në Evropë.
Përkundër përpjekjeve të vazhdueshme të agjencive kufitare të Bashkimit Evropian për të zvogluar numrin e kontrabanduesve duke i dekurajuar ata të marrin një udhëtim të këtillë, arsyet kryesore pse njerëzit marrin këtë rrugë të vdekjes, mbeten jostabiliteti në Lindjen e Mesme dhe në Afrikën Veriore.
Përgatiti: Jeton Zenuni – /tesheshi.com/
