Skuadra gjermane e Borusias së Dortmundit do të mbetet dhe në këtë sezon rivalja numër një e Bajernit të Mynihut në Bundesligë. Ashtu siç bëri vitin e shkuar, kur me paraqitjet e veta iu kundërvu sa mundi supremacisë së bavarezëve.
Vetëm një ditë më parë Borusia ka turpëruar në një takim parasezonal Mançester Junajtedin, duke fituar 4-1. Në Shangain e largët, gjermanët patën tërë epërsinë ndaj anglezëve, që nën drejtimin e Mourinho-s pësuan humbjen e parë, e për më tepër në një ndeshje ku diferencat ishin të mëdha.
Borusia duket rishtas një skuadër mjaft e organizuar, edhe pse ka humbur një element të rëndësishëm si armeni Mkhitaryan, që do të shënonte dhe të vetmin gol për Man. Juanjtedin. Një tjetër largim i kësaj vere ka qenë mesfushori Ilkay Gündoğan, që po ashtu ka zgjedhur si destinacion Mançesterin, veçse në ekipin tjetër, te Siti. Gündoğan ka qenë një element thelbësor i Dortmundit, por dëmtimet e fundit vitin e kaluar e kanë mësuar skuadrën të bëjë dhe pa të, çka do të thotë se mungesa e tij nuk do të ndjehet shumë.
Krahas largimeve, ka patur afrime shumë spikatëse. Një ditë më parë u lajmërua blerja e 25-vjeçarit Andre Schürrle nga Volfsburgu. “Schürrle është një lojtar me potencial të jashtëzakonshëm ofensiv, e cilësia e tij do të jetë shumë e vlefshme për ekipin tonë,” deklaroi drejtori sportiv i Borusias, Michael Zorc, pas lajmërimit të transferimit.
Më herët gjatë kësaj jave, të mërkurën, Mario Goetze do të ribashkohej me Borusian e Dortmundit pas një eksperience të gjatë jo të suksesshme të Bajerni i Mynihut. Një afrim mjaft me vlerë për ekipin, duke kujtuar se Goetze ka patur rol të veçantë në fitimet e trofeve vite më parë.
Marc Bartra është marrë po ashtu nga Barcelona për të mbushur hapësirën e lënë nga kapiteni Hummels, që në mbarim të sezonit të shkuar u largua drejt rivalëve të Bajernit të Mynihut.
Ndeshjen e parë në Bundesligë, Borusia e Dortmundit e luan të shtunën e 27 gushtit, kur pret në fushën e vet Mainzin. Ndërkaq, më 14 gusht luhet Superkupa e Gjermanisë, që vë përballë pikërisht Borusian e Dortmundit dhe Bajernin e Mynihut. /tesheshi.com/
