Ministri i Jashtëm britanik, Boris Johnson tha se “ai është krenar për rolin britanik në krijimin e shtetit të Izraelit”.
Këtë të enjte shënohet 100-vjetori i “Deklaratës së Balfour-it”, me të cilin Ministri i Jashtëm i atëhershëm i qeverisë britanike i kërkoi qeverisë së vendit të tij që të mbështeste hebrenjtë në Palestinë.
Kryeministri izraelit Benjamin Netanjahu do të vizitojë Londrën me rastin e shënimit të 100-vjetorit të kësaj ngjarjeje, e me këtë rast Boris Johnson nënvizoi marrëdhëniet miqësore mes dy vendeve.
“Deklarata Balfour-it” ishte një deklaratë publike nga qeveria britanike gjatë Luftës së Parë Botërore, me të cilën është paralajmëruar mbështetja për krijimin e një “Shtëpie Kombëtare për popullin hebre” në Palestinë, në rajonin e atëhershëm otoman me një popullsi pakicë hebreje.
“Qeveria e Madhërisë së Tij shpreson të krijojë një Shtëpie Kombëtare për popullin hebre në Palestinë dhe do të ndërmarrë përpjekjet më të mira të saj për të lehtësuar arritjen e këtij qëllimi dhe është qartë e kuptueshme se nuk do të ndërmerret asgjë që mund të dëmtojë të drejtat civile dhe fetare të bashkësive ekzistuese jo-hebraike në Palestinë ose të drejtat dhe statusin politik të hebrenjve në çfarëdo vendi tjetër”, thuhet në deklaratë.
Deklarata është përmbajtja e letrës së 2 nëntorit 1917 që ministri i Jashtëm i Mbretërisë së Bashkuar, Arthur Balfour i dha Walter Rothschild, udhëheqësit të Bashkësisë Hebraike Britanike, për t’ia transmetuar Federatës Zioniste të Britanisë së Madhe dhe Irlandës. /tesheshi.com/
