NATO nuk mund të jetë një aleancë ushtarake që varet nga disponimi i presidentit amerikan, tha kreu i diplomacisë evropiane, Josep Borrell, lidhur me deklaratën e ish-presidentit Trump se nuk do të mbronte vendet që nuk paguajnë detyrimet e tyre ndaj NATO-s dhe se ai do ta “inkurajonte” Rusinë t’i sulmonte.
Në prag të takimit të ministrave të zhvillimit të Bashkimit Evropian, Borell, i pyetur për të komentuar deklaratën e Trump, tha se “NATO nuk mund të jetë një aleancë ushtarake që varet nga humori i presidentit amerikan”, raporton Reuters.
Traktati i Atlantikut të Veriut përmban një dispozitë që garanton mbrojtjen e ndërsjelltë të shteteve anëtare në rast të një sulmi.
Trump, kandidati kryesor për nominimin presidencial republikan, ishte një kritik i ashpër i Organizatës së Traktatit të Atlantikut të Veriut gjatë kohës së tij si president, duke kërcënuar vazhdimisht se do të tërhiqej nga Aleanca. Ai shkurtoi fondet e NATO-s dhe shpesh ankohej se SHBA po paguante më shumë se pjesa e saj e drejtë.
Gjithashtu, duke folur për Agjencinë e OKB-së për Ndihmën dhe Punët për Organizatën për Çlirimin e Palestinës (UNRWA), Borell tha se duhet të jetë në gjendje të vazhdojë të punojë ndërkohë që përfshirja e mundshme e disa prej 13,000 anëtarëve të stafit të saj në sulmin e Hamasit të 7 tetorit në Izraelin jugor është duke u hetuar.
“Askush tjetër nuk mund të bëjë atë që mund të bëjë UNRWA, akuzat duhet të verifikohen. Të presim të kryhen hetimet. Ndërkohë, njerëzit duhet të hanë, duhet të shkojnë te mjeku”, tha Borell. /tesheshi.com/
