Lideri opozitar Zoran Zaev, e ka quajtur kryeministrin Gruevski njeri pa ndërgjegje, pasi nuk po i përgjigjet popullit i cili kërkon dorëheqje nga ai. Komentet i bëri pasi shpalosi bombën e radhës të përgjimeve të cilat siç tha, zbardhin detaje tjera të korupsionit dhe keqpërdorimit të pushtetit.
Ai publikoi një bisedë të përgjuar në të cilën siç tha, dëgjohet zëri i ish-ministres së Brendshme Gordana Jankullovska e cila ndikon që të ndërpritet procedura për ndjekje penale të një kompanie, dhe kjo vetëm nga shkaku se e njejta ka finansuar partinë maqedonase në pushtet,VMRO-DPMNE.
Te kompania në fjalë janë gjetur 5.5 tonelata naftë e kuqe, e ndaluar në komunikacion : “Nga fjalët që mi thua, edhe ai nuk është ‘i pastër’, por nëse na ka ndihmuar, ngadalësoni procedurën”, thotë Jankullovska, në bisëdën e shpalosur.
Në një tjetër bisedë, Zaev akuzoi pushtetin se ka kurdisur një tender të vlefshëm 350 milionë euro, të cilën e ka fituar një kompani maqedono-bullgaro-çeke: “Interesi i Gruevskit është rruga e 350 milionë eurove dhe ato kanë përfunduar tek vëllai i Gordana Jankullovskës, të cilën ai e dërgoi në histori”, tha Zaev.
Lideri opozitar u shpreh optimist se kriza politike do të zgjidhet kah fundi i qershorit, ndërsa apeloi që SHBA-të dhe BE-ja të ndihmojnë:
“Ka sinjale të qarta se SHBA-të dhe BE do të dërgojnë ndërmjetësues në negociatat dhe nuk do të lejojnë të na kapë vera. Është herët të themi se vallë do të ketë zgjedhje por sidoqoftë, dikush duhet të garantojë se Maqedonia do të mbajë zgjedhje fair dhe demokratikeќе, ndërsa ai, nuk është Gruevski” deklaroi Zaev.
/tesheshi.com/
