Deputeti i Partisë Socialiste, Ben Blushi, deklaroi në Kuvend se është kërcënuar me mesazh në telefon nga kryetari i Bashkisë së Kavajës, Elvis Roshi. Në seancën paraardhëse, Blushi u tregua i ashpër ndaj atyre që i cilëson elementë kriminalë në politikë, ku edhe pse nuk e përmendi me emër, siç nuk ka përmendur askënd deri më tani, aludoi për një ndër ta, Elvis Roshi, njeriun që prej 5 vjetësh drejton Kavajën.
Kjo për arsye se në formularin deklarues në kuadër të zbatimit të ligjit mbi dekriminalizimin, Roshi, për arsyet e ndalimit dhe dëbimit nga Gjermania vite më parë, shprehej se “nuk i mbante mend arsyet”.
Tek çështja “Roshi”, interesant është fakti se dhe ai, si disa eksponentë të tjerë nga e majta të cilët akuzohen si individë me precedent, kanë qenë dikur pjesë e PD-së. Këtu mund të përmendim ish-deputetin e Lezhës Arben Ndoka, apo Klement Balilin, i cili tashmë është dhe në kërkim ndërkombëtar për trafik droge. /tesheshi.com/
