Turqia ka aplikuar zyrtarisht për t’u bashkuar me BRICS, grupi kryesor i tregjeve në zhvillim, sipas Bloomberg, pasi ajo kërkon të rrisë ndikimin e saj global dhe të krijojë lidhje të reja përtej aleatëve të saj tradicionalë perëndimorë, sipas njerëzve që ndjekin këtë çështje.
Të njëjtat burime thanë se qeveria Erdogan konsideron se qendra gjeopolitike e gravitetit po largohet nga ekonomitë e zhvilluara dhe se kjo lëvizje pasqyron ambiciet e vendit për të kultivuar lidhje “me të gjitha palët në një botë shumëpolare” duke përmbushur ende detyrimet e saj si anëtare kyçe e NATO.
Në fillim të korrikut, gjatë vizitës së tij në Kinë, ministri i jashtëm turk Hakan Fidan shprehu dëshirën e vendit të tij për t’u bashkuar me BRICS. Përfaqësuesi i shtypit i presidentit rus, Dmitry Peskov, e kishte mirëpritur këtë “interesim të shtuar për organizatën BRICS”.
“Turqia mund të bëhet një vend i fortë, i begatë, prestigjioz dhe efektiv nëse përmirëson marrëdhëniet e saj me Lindjen dhe Perëndimin në të njëjtën kohë,” tha Erdogan në Stamboll gjatë fundjavës. “Çdo metodë tjetër përveç kësaj nuk do t’i sjellë dobi Turqisë, por do ta dëmtojë atë.”
BRICS, i quajtur sipas inicialeve të Brazilit, Rusisë, Indisë, Kinës dhe Afrikës së Jugut, përfshin disa nga ekonomitë më të mëdha në zhvillim. Ajo fitoi katër anëtarë të rinj në fillim të këtij viti kur Irani, Emiratet e Bashkuara Arabe, Etiopia dhe Egjipti iu bashkuan radhëve të saj. Arabia Saudite është ftuar gjithashtu të bashkohet, megjithëse mbretëria ende nuk e ka bërë këtë.
Zgjerimi i mëtejshëm i grupit mund të diskutohet gjatë një samiti në Kazan, Rusi, nga 22 deri më 24 tetor, thanë burimet. Malajzia, Tajlanda dhe aleati i ngushtë i Turqisë, Azerbajxhani, janë midis vendeve të tjera të prirura për t’u bashkuar.
Përfaqësuesja e Ministrisë së Punëve të Jashtme ruse, Maria Zakharova, në deklaratën e saj qershorin e kaluar, lidhur me anëtarësimin e Turqisë, deklaroi se “dyert e Bashkimit (përfshirë BRICS) janë të hapura. Ka disa kritere, ato duhet të jenë në përputhje me dëshirën e vendeve për t’u anëtarësuar në një Union, i cili do të bazohet në respektin reciprok dhe jo në anëtarësimin në një klub elitar”. Ministri i Jashtëm turk Hakan Fidan nga ana tjetër do deklaronte: “Kemi marrëdhënie, jemi në diskutime dhe negociata me shtetet anëtare. Dhe këto janë aktualisht në një proces evolucioni”. /tesheshi.com/
