Jeta e palestinezëve po përkeqësohet dita ditës nën bllokadën izraelite në Rripin e Gazës. Një raport i fundit nga vendi jep alarmin se 85% të popullsisë jeton nën kufirin e varfërisë. Sipas hetimit të kryer nga Komiteti Popullor Palestinez, gjendja nuk ka qenë asnjëherë kaq e rëndë.
Duke theksuar situatën humanitare në Gazën e bllokuar nga Izraeli, kreu i Komitetit Popullor tha se “kushdo që e injoron situatën e rëndë ekonomike nuk dëshiron të gjejë zgjidhje”. Ai gjithashtu bëri thirrje që bashkësia ndërkombëtare të ndërmarrë veprime për t’i dhënë fund okupimit izraelit në mënyrë që të heqë rrethimin e plotë në Rripin e Gazës.
Sipas po këtij komiteti, të ardhurat mesatare ditore për frymë janë maksimum 2 dollarë, dhe shkalla e papunësisë është 65% tek të rinjtë. Një numër i madh palestinezëve kanë demonstruar prej kohësh kundër niveleve të larta të papunësisë në Rripin e Gazës, e cila është duke u rritur edhe më tutje nën bllokadën izraelite. Më shumë se 300,000 persona janë regjistruar si të papunë në mes të përkeqësimit të vazhdueshëm të kushteve ekonomike, ndërsa ky numër po rritet çdo ditë si rezultat i pezullimit të projekteve kritike për shkak të bllokadës së Izraelit.
Për më tepër, kushtet e rënda ekonomike kanë çuar në mbylljen e dyqaneve, ndërmarrjeve ose fabrikave të cilat preken shumë nga bllokada ndër vite.
Shtatorin e kaluar, Banka Botërore paralajmëroi se ekonomia e Gazës ishte në “rënie të lirë”, duke i bërë thirrje Izraelit dhe bashkësisë ndërkombëtare që të ndërmarrin veprime të menjëhershme për të shmangur një “shembje të menjëhershme” të territorit Palestinez.
Që nga viti 2007, Rripi i Gazës ka qenë nën bllokadë izraelite dhe egjiptiane që ka shkatërruar ekonominë e saj dhe ka privuar afërsisht 2 milion banorë të saj nga shumë mallra jetike, përfshirë ushqimin, karburantin dhe ilaçet.
Me varfëri të lartë dhe papunësi të lartë, shumë prej 2 milion banorëve të saj varen nga shërbimet e ofruara nga organizatat e ndihmës.
Bllokada e gjatë e Izraelit krijon pengesa serioze për hyrjen e një sërë furnizimesh mjekësore. Situata humanitare në territoret e okupuara palestineze është përkeqësuar më tej pasi spitalet luftojnë për të përballuar viktima të mëdha që kur protestat në kufirin Gaza-Izrael filluan vitin e kaluar. Sistemi shëndetësor në Gaza ka 13 spitale publike dhe 14 klinika, të drejtuar nga organizata joqeveritare, dhe në punën e tyre ka pasur mungesa të vazhdueshme të furnizimeve mjekësore e kirurgjikale. /tesheshi.com/
