Pas vendimit të Sllovenisë për të mos lejuar më kalimin në kufirin e saj të personave që nuk posedojnë dokumentacionin e nevojshëm dhe viza hyrëse, e pas reagimit të Serbisë që lajmëroi për zbatimin e kritereve të njëjta, është Hungaria që ndërmerr hapa të mëtejshme për ta bërë kufirin e vet të pakalueshëm.
Qeveria hungareze ka njoftuar për dislokimin e 1.500 trupave shtesë në kufirin me Serbinë, ndërsa ka zgjatur një gjendje të jashtëzakonshme për shkak të krizës së refugjatëve. Hungaria i druhet mënyrës së veprimit të refugjatëve të bllokuar në Ballkan.
Ka qenë ministri i Brendshëm hungarez, Sandor Pinter, që e ka dhënë dje lajmin për dislokimin e trupave shtesë në një konferencë shtypi në Budapest.
Vendimi i Sllovenisë e ka mbyllur praktikisht rrugën ballkanike të kalimit të refugjatëve, çka ka sjellë shqetësim te autoritetet hungareze. “Nuk e dimë se si do të reagojnë emigrantët e bllokuar në vendet e Ballkanit,” ka thënë Pinter në konferencën për shtyp.
Shtrëngimet në kufijtë ballkanikë i kanë detyruar refugjatët të kërkojnë kalimin në kufirin hungarez. Policia hungareze ka arrestuar që nga fillimi i marsit 976 persona për kalimin e paligjshëm të rrethimit kufitar, ndërsa numri i refugjatëve në qendrat e ndalimit dhe në kampet e hapura është trefishuar që nga mesi i shkurtit. /tesheshi.com/
