Qengjat dhe kecat, por edhe fruta-perimet ekzotike që rriten në Shqipëri “ua kanë bërë me sy” arabë që po qëndrojnë në Tiranë.
Një delegacioni i kryesuar nga Ministri i Bujqësisë së Arabisë Saudite, Ahmed Saleh Alkhamshi, u mirëprit nga homologu shqiptar Bledi Çuçi, ku takimi i tyre u fokusua në rritjen e bashkëpunimit tregtar mes dy vendeve – kryesisht në eksportin drejt Arabisë të të imtave, qengjave dhe kecave.
Në marrëveshjen që pritet të nënshkruhet pas procedurave hetimore, sauditët po synojnë edhe eksportin e fruta-perimeve edhe të jonxhës.
Veç eksportit të produkteve bujqësore e blegtorale, me interes të madh nga pala arabe ishte edhe bashkëpunimi në sektorin e akuakulturës, i cili është një nga sektorët me rritjen më të madhe në ekonominë shqiptare gjatë katër viteve të fundit.
Pala arabe shprehu interes të veçantë të zhvillimit edhe kultivimit të hurmës, e cila kërkon temperatura të ngjashme me ato që dominojnë në vend gjatë verës.
Por kecat dhe qengjat nuk marrin dot rrugën drejt Lindjes pa marrë certifikatën “hallall”, e cila do të mundësohet falë ngritjes së komisionit të përbashkët për vlerësim. /tesheshi.com/
