Furtuna që ka mbërthyer drejtuesit më të lartë të FIFA-s ka marrë me vete dhe kreun e UEFA-s, të shumëpërfolurin Michel Platini, i cili shihej si pasuesi i mundshëm i Sepp Blatter-it.
Blatter dhe Platini janë pezulluar për 90 ditë nga detyra prej Komitetit të Etikës së organizmit botëror futbollistik.
Në një njoftim të dhënë sot prej këtij komiteti, shpjegohet se, “Arsyet e këtyre vendimeve janë hetimet që po kryhen nga zyra e hetimeve e Komitetit të Etikës.”
Prokurori i përgjithshëm zvicerian e ka përshkruar pozicionin e Platini-së si diçka mes dëshmitarit dhe personit të akuzuar.
Ndryshe tij, pozita e Blatter-it duket më e rënduar. Prokurorët zvicerianë hapën muajin e shkuar një hetim për të në lidhje me nënshkrimin e një kontrate të të drejtave televizive, si dhe për pagimin Platini-së në vitin 2011 të dy milionë frangave.
Veç Blatter-it dhe Platini-së, është pezulluar dhe sekretari i përgjithshëm i FIFA-s, Jerome Valcke. Ndërkohë, ish-zëvendëspresidenti i FIFA-s, Chung Mong-joon është përjashtuar për gjashtë vite dhe është gjobitur me 100.000 franga zviceriane. /tesheshi.com/
