Takimi i ministrave të Jashtëm të një numri shtetesh është zhvilluar sipas parashikimeve dje në Vjenë, pavarësisht ngjarjeve të Parisit. Kryediplomatët janë mbledhur edhe një herë tjetër për të përvijuar në lidhje me Sirinë një rrugë drejt armëpushimit dhe tranzicionit politik, në përpjekje për t’i dhënë fund konfliktit që ka trazuar tërë botën.
Sipas tyre, Siria duhet të mbajë zgjedhje brenda 18 muajve, grupet opozitare duhet të përfshihen në bisedimet e ardhshme mbi procesin politik në vend, e duhet të ketë menjëherë një armëpushim.
Në mbarim të bisedimeve, sekretari amerikan i Shtetit, John Kerry, deklaroi se negociatat mes qeverisë siriane dhe opozitës duhet të nisin nga 1 janari i vitit të ardhshëm.
Një qeveri tranzicioni duhet të krijohet brenda gjashtë muajve, ka bërë të ditur Kerry, dhe vendi të ketë zgjedhje në 18 muaj.
Kerry e përjashtoi mundësinë që ISIS-i dhe Fronti el-Nusra të jenë pjesë e armëpushimit dhe e bisedimeve.
Në lidhje me Beshar Esadin, Kerry sqaroi se nuk kishte marrëveshje në lidhje me të ardhmen e tij.
“Ne ende kemi dallime mbi atë se ç’ngjet me Beshar Esadin,” tha John Kerry në një konferencë shtypi të përbashkët me ministrin e Jashtëm rus, Sergei Lavrov.
Sekretari amerikan i Shtetit do të shtonte gjithashtu në këtë konferencë se pesë anëtarët e përhershëm të Këshillit të Sigurimit të OKB-së kishin rënë në një mendje që të kalonin një rezolutë në favor të një armëpushimi në Siri.
Ministri i Jashtëm i Gjermanisë, Frank-Walter Steinmeier, përsëriti po ashtu se do të kishte përpjekje për të bërë një kushtetutë të re për Sirinë dhe për të krijuar një qeveri tranzicioni brenda 18 muajve.
Takimi i djeshëm në Vjenë i rreth 20 vendeve, të përfaqësuara nga ministrat e Jashtëm dhe zëvendësit e tyre, u zhvillua në vijim të takimeve të tjera të mëparshme mbi të njëjtën çështje: gjetjen e një zgjidhjeje për konfliktin sirian. /tesheshi.com/
