E shumëpritura bisedë telefonike mes presidentit të ri amerikan, Donald Trump, dhe homologut të tij turk, Recep Tayyip Erdoğan, është zhvilluar në orët e mbrëmjes të së martës.
Një bisedë që ka zgjatur për 45 minuta, dhe e para që prej hyrjes së Trump-it në Shtëpinë e Bardhë.
Duke iu referuar asaj çka përcjellin mjetet turke të informimit, presidenti Trump ka përsëritur në bisedën telefonike mbështetjen amerikane për Turqinë si një partner strategjik dhe si një aleat i NATO-s.
Në një njoftim të Shtëpisë së Bardhë thuhet se Trump e ka mirëpritur kontributin e Turqisë në fushatën kundër ISIS-it.
Marrëdhënia e ngushtë dhe e gjatë midis SHBA-së dhe Turqisë është theksuar po ashtu në bisedë, si dhe angazhimi i përbashkët për ta luftuar terrorizmin në të gjitha format e tij.
Nuk bëhet e ditur nëse është folur në këtë bisedë për disa çështje të ndjeshme në marrëdhëniet midis dy shteteve.
E pakënaqur nga administrata e mëhershme amerikane për shkak të ngurrimit posaçërisht për ta dorëzuar Fethullah Gülen-in, njeriun përgjegjës për grushtin e dështuar të shtetit në mesin e vitit të shkuar, si dhe të mbështetjes së saj për YPG-në dhe PYD-në në Siri, degët siriane të PKK-së, organizatës terroriste kurde, Turqia shpreson se Trump-i nuk do të vijojë në të njëjtën linjë veprimi. /tesheshi.com/
